Leeds hnehin Arsenal an tlang
Arsenal boruak a fuh laklawh, season tir lamah talbuai mah se tunah chuan an insiamrem tia sawi ngam a ni ta. Mikel Arteta naute hian Leeds United 2-0 a hnehin Carabao Cup quarterfinal an lut.
Thawhlehni zan Emirates Stadium-a inkhelah Gunners tan defender Calum Chambers-a'n goal hmahruai a tauh lut a, striker Eddie Nketiah chuan tawih zetin an goal hnihna a khung bawk Marcelo Bielsa naute lamin a chhan letna tur an nei lo.
League Cup last 16 inkhel dangah Chelsea leh QRP an tlang bawk a, nizan khan quarterfinal lut tur hi chinfel a ni. Champion lai Manchester City an inlan a, a zawna vawi li champion thei Citizens hi an result kan hre hman lo a ni.
An inkhek
Arsenal hian tun kartawpah Leicester City an hmachhawn zui dawn, kar khata match hnih khelh chu a hautak ṭhin. Manager Arteta-a'n a player ṭha tam zawk chu hahchawlhna hun a pe - captain Pierre-Emerick Aubameyang phei chu squad-ah telh a ni lo.
Alexandre Lacazette pawh bench lama dah a ni. Premier League lama a chhawr rim zingah chuan defender Ben White leh Emile Smith Rowe te chauhin bul an ṭan, heti chung hian Nicolas Pepe leh Gabriel Martinelli te an la nei tho.
Leeds pawh an ṭhat dan berin an khel bik lo, an match hnuhnunga hliam tenau nei Raphinha a inlan lo a, striker Patrick Bamford a hmel kan hmu lo bawk. Argentina manager Bielsa-a'n chak a duh a, chutih rualin Premier League lam a ngaihthah thei bik lo a ni.
Laipui a puak
Team pahnihin attacking game khel mah se chawlhlawk hmain goal kan hmu lo. Minute 55-naah White chu hliam vanga lakchhuah a ngai a, a hmun ruakah Chambers a rawn lut - English defender hian khelmual a luh aṭanga minute khat liam hmain goal a khung.
Corner aṭanga ball kal chu Pepe-a'n a tauh a, ball kang hi Chambers chuan a lo tauh fuh chhawng leh. Keeper Illan Meslier-a'n a lo dang hman angin a lang, mahse goal-line technology hmangin line a pel hman tih finfiah a ni a, a pel ngei bawk.
Minute 69-naah laipui a puak zui, Leeds lamin an back pass chu keeper aiin Nketiah-a'n a lo khawih fuh hmasa a, English striker hian sang taka Meslier a tih khum hnuah cool takin an goal hnihna a khung a, a chet danin manager Arteta a ti lawm hle.
Beiseina a awm
Inkhelh zawh hnuah Arteta chuan Nketiah lakah beiseina a neih thu a sawi. Hale End aṭanga a inzir chhuah pui Emile Smith Rowe leh Bukayo Saka te ang bawkin senior team huangah hmun pawimawh a chan theih a rin thu a sawi.
Arteta chuan, "Arsenal hian player ṭha tak tak a lo chher chhuak tawh ṭhin, chutiang zingah chuan Nketiah pawh a tel ka beisei - he club-ah ngei hian player ṭha tak a nih ka duhsak," tiin a sawi a, chhuak loa cham turin a duh tih a sawi lang bawk.
Arsenal tan hnehna chan hi lawmna tur a ni a, player khel khat zawk ten hmun an chan theihna a nih avangin a lawmawm zual. Leeds erawhin kum 2003 hnu lamah Gunners mualah hnehna an la chang leh thei lo a ni.
Chak loh a pawi
Leeds United manager Bielsa chuan, "Inkhel chawhma lamah kha chuan min nawr lo thei lo dinhmunah an ding a, keini lam pawhin goal khung theihna remchang kan neih phah, a hnu lamah erawh goal kan chhuah kha a pawi hle.
"Inhnehtawk taka goal chhuah hmasa nih chuan a nghawng a na tawh ṭhin. Arsenal kha goal an neih hnuah an inveng tlat a, keini lam tan a harsa tawh ṭhin. Chak lo zawk nih a pawi a, inelna aṭanga tlak phei chu pawi tak a ni," tiin a sawi.
Leeds hian attacking game hmuhnawm an khel ṭhin a, mahse season kal laia an hman thiam Raphinha tel lo chuan an tlarhma a hriam tawk lo. Tunkar tawpa Norwich City an lenchilh hunah chuan Brazilian star hi a inlan theih a rinawm.