NT Biakkima a inhnek leh dawn ta

Mizo boxer chhuanvawr NT Lalbiakkima chuan IBA intercontinental title a hlawhchhuah hnua a vawi khat nan ring chhung a rap leh dawn ta a, November 27 zan khian Thai boxer Gerttipong Kumsahwat lakah a title humhim a tum dawn.

Siaha boxer NT-a inlanna tur hi LPS Fight Night tih a ni a, LPS chuan pay-per-view a en theih turin an pe chhuak dawn - Dawrpui Multipurpose Hall-ah IBA title fight hi neih tur a ni dawn a ni.

NT-a chuan, "Ka beisei ber chu world title a ni a, chumi kalkawng atan chuan he inhnek hi a pawimawh takzet a, ka tan chuan fiahna a ni dawn. Mizo mipuite ṭawngṭaipuina ka mamawh reng a ni," a ti a, a inbuatsaihna chu ṭawngṭaina tel lo chuan engmah a nih loh thu Vanglaini a hrilh.

LPS Pro-fight aṭanga Mizo mipuite hriat hlawh NT-a hian August 6 khan IBA intercontinental title hlawh chhuak turin Sandeep Singh chu Mumbai khawpuiah technical knockout hmangin a lo hneh tawh - he inhnek hi round riat tura tih ni mah se NT-a'n chak turin round hnih khelh bak a mamawh lo.

NT-a chuan, "Ngawrh takin inbuatsaihna ka nei reng a, ring chhung lut turin ka inpeih leh tawh. Ka tha zat vanglai tak a ni a, Kumsahwat hi Thai boxer ṭha tak ni mah se ka hneh ngei ka inring a ni," tiin Vanglaini a hrilh.

Mizo boxer NT-a leh Kumsahwat te hi round 10 chhung inhnek turin ruahmanna siam a ni a, Siaha tlangval hi Mizo professional boxer zinga round 10 fight hmachhawn hmasa ber tur a ni dawn.

'Zo Keite' tih ngata hming lem an pek NT-a hian a team-te nen training ngawrh takin an kalpui mek a, coach Lalmuanpuia leh strength & conditioning coach Biakzuala (Gtea) te kaihhruaina hnuaiah a title humhim turin a inpeih tawh hle.

NT-a chuan, "Kan boxing hall (NTP Boxing Hall) ah riak lutin kan team kan inbuatsaih a, kawng tinrengah Dr. Lalmuanpuia (MF &AS) in min buaipui a, a chungah ka lawm hle," tiin fight neih tura an inbuatsaihna kawnga puitute lawmthu a hrilh.

Marine Pro Boxing Promotions buaipui tur LPS Fight Night-ah hian NT-a bakah NTP Boxing Team leh Sete Boxing Academy aṭangin Mizo boxer dang engemawzat an inlan dawn bawk a, Vanlalawmpuia, Zoramchhana, Laldingliana, Lalhruaitluanga, Lalramfela leh Lalrinhlua ten inhnek an hmachhawn ve dawn bawk a ni.