A chung berah AC Milan an awm Olivier Giroud-a goal khat a tawk
AC Milan chuan kum 67 hnua Serie A season bul an ṭan ṭhat ber ṭum an tawng a, coach Stefano Pioli naute hian match 10 aṭanga point 28 hmuin table chung berah an awm - tun season league match bikah point hnih chiah an la hloh.
Thawhlehni zan San Siro-a inkhelah Milan hian an mikhual Torino chu 1-0 in an hneh, goal awmchhun hi Olivier Giroud-a'n minute 14-naah a khung niin, a club tan point thum hlawh chhuah nan a tawk.
Giroud-a goal
Arsenal leh Chelsea tan hlawhtling takin a khel tawh, mahse London club tan khelhna hmun nghet a chan tawk loh avangin Milan a pan - France international hi kum 35 mi ni tawh mah se goal khung a la thiam reng.
Torino lakah hian Zlatan Ibrahimovic chu bench-ah dah a ni zawk, inkhel bul ṭantu Giroud-a'n a hun ṭha neih a bawhpelh lo. Inkhel tir lamah Rade Krunic-a thawhrah sengin hnai tak aṭangin goal awmchhum hi a khung a ni.
Giroud hian Milan a pan hnuah goal li a khung tawh, a goal khungte hi San Siro-ah vek a ni a, a kum tam deuh tawh mah se Ibra nen an la rintlak viau a, an vanglai pelh tawh hnuah Milan hi ropuina an chanpui a nih pawhin a mak lo ang.
Torino hian si phurh sut theihna remchang an nei, mahse Tommaso Pobega-a ball tauh chu goal pawnah chiah a kal. Leicester City aṭanga loan hmanga an hawh Dennis Praet pawhin hun tawp dawnah bar chungah a ti chhuak hlauh bawk.
A lungawi
Club tana match a khelh tam loh miau avangin Olivier Giroud-a'n France lamah pawh khelhna a chang lo chho mek a, striker ṭha Karim Benzema nen an inel thar leh tak bawk avangin club tana khelh ṭhat a mamawh zual - atan goal khung hi a pawimawh hle.
Giroud chuan, "Mimal khelh ṭhat ringawt a tawk lo, a pawimawh lai chu kan zavaia kan khelh ṭhat kha a ni. Torino ang team ṭha laka ṭha taka kan khel thei khan min ti lawm, goal khungtu nih theih phei chu lawmna a zual.
"Tunah hian league match 10 chhung tlawm loin kan kaltluang ta, hei hi mimal thil tih a ni lo. Team chhunga player awm zawng zawngin theihtawp kan chhuahna rah chhuah a ni," tiin a sawi a, khelhna hmun siamsaktu Pioli chungah a lawm bawk.
Nakkum hian Qatar World Cup a awm dawn, France tana khelh phak ngei tumin Giroud hian thapui a thawh mek. Milan tana rinrawl a ni phak a nih ngat chuan Les Bleus manager Didier Deschamps tan pawh en kan reng thei a ni lo ang.
A chung berah
Stefano Pioli hian season hmasa khan Milan hi Serie A-ah pahnihna a nihpui, 2011-12 season hnua an thlen san ber ṭum a ni. Nikum tir lama ban an tum hman hial ni mah se tunah chuan hun rei tak hnua season bul an ṭan fuh ber ṭum an tawng leh ta.
Italian manager Pioli chuan, "Ni 10 chhunga match li kan khelhna a ni a, team ṭha kan hmachhawn avangin a awlsam lo. Player siksawi a ngai a, mahse a ṭha zawng zawng siksawi erawh a rem si lo, huaisen taka hnehna min chanpuitu ka naute chungah ka lawm.
"Torino khan min nawr na hle, mahse hun harsa karah pawh player ṭhenkhat hliam a dam tawh a, tha thara khel thei kan neih avangin kan vannei," a ti. Hliam leh hrileng vanga chawl Theo Hernandez leh Franck Kessie ten match an khel leh thei chu an chakna hnar a ni.
Milan hian tunkar tawpah AS Roma an hmachhawn zui leh nghal dawn. Roma hi team ṭha leh khawng tak an la ni lo, mahse tlawn duh lo Jose Mourinho enkawl an ni a, an hmelma Inter Milan a enkawl laia thawnnthu a lo neih nual tawh avangin an inkhel tur hi a ngaihnawm ang.