Zaninah champion lai Atletico inlan dawn
La Liga champion Atletico Madrid chuan zanin dar 1:00-ah league match khel turin Levante chu khualmualah an lenchilh dawn a, an match hnuhnung bera chak zo lo team hian point thum nena haw theih an beisei ang.
Diego Simeone enkawl Atletico hian kar hmasa khan league match inkhelah hmahruaitu Real Sociedad chu 2-2 in an inhnehtawkpui a, table-ah palina an ni mek.
Zanin inkhelah Levante an hneh lo a nih chuan nizan inkhel result a zirin an dinhmun a hniam viau thei a, Simeone-a naute tan chak a pawimawh.
Hetihlai hian Sociedad laka inhliam Thomas Lemar chu a inlan theih a la rinawm chiah lo a, Liverpool laka inhliam Marcos Llorente pawh a inlan a rinawm lo.
Stefan Savic leh Geoffrey Kondogbia te an dam chho ṭan a, Simeone-a'n a mamawh viau a nih chuan chhawr theih tur an ni tawh. Mahse, Argentine coach tan hmanhmawh loh a fuh zawk ang.
Simeone hian an league match hnuhnung berah tlarhmaa a player neih ṭhat pathum, Luis Suarez, Joao Felix leh Antoine Griezmann te a khelh ho tir a, zaninah Levante lakah a khelh ho tir leh ang em, tih chu zawhna awm mek a ni.
Sociedad lakah chuan Simeone hian a tifuh viau lo - si hnih an phur hmasa a, Suarez-a goal hnih hmangin an chhanglet hram. Player pathum a ruala luhtir ai chuan goal mamawh huna lut tur a tu emaw ber dah ṭhat pawh a fuh mai thei.
Suarez hi kum 34 mi ni ve tawh mah se goal khung erawh a la ṭhulh lo a, tun season-ah Atletico tan inelna hrang hrangah match 12 khelin goal sarih a khung leh der tawh - assist vawi khat a nei tel.
Chutihrual chuan Atletico hian Pathianni zanah Real Betis chu La Liga khel turin an mikhual zui leh dawn a, Nilaini zanah Champions League match pawimawh khel turin Liverpool an lenchilh dawn bawk
Heng zawng zawng thlir chuan Simeone-a'n an ṭhat dan berin Levante an lenchilh kher lo mai thei a, Argentine coach dem theih a ni lo ang.
Hetihlai hian La Liga hma-hruaitu Real Sociedad chu zanin dar 10:30-ah an inlan dawn bawk a, khualmualah Celta Vigo an lenchilh ang.
Copa del Rey 2020-a champion puitu Imanol Alguacil enkawlna hnuaia khel Sociedad hian league-ah match 10 khelin point 21 an nei mek a, an hnuaiah nizana inkhel Real Madrid leh Sevilla te point 20 neiin an awm - nizan inkhel result a zirin he thuziak i chhiar meuh chuan an dinhmun a danglam leh tawh mai thei.
Sociedad hian Manchester City legend David Silva, Manchester United winger hlui Adnan Januzaj, Spain international Mikel Oyarzabal leh Swedish forward ṭhangduang Alexander Isak te ho an nei a, league-a hma an hruai hi an vanneih vang a ni lo - an thiam vang a ni.