James tel loin Lakers an chak

Inkhelh dawn hnai tawhah LeBron James chu ke rek hliam vangin a inhnukdawk a, an player ṭha ber awm lo mah se Los Angeles Lakers hi an chak tho, an khingpui San Antonio Spurs chu 125-121 in an hneh.

Nimin zing NBA regular season inkhelah team pahnih an inkel tawk hle, quarter hnuhnung ber khelh laiin Spurs lam hian point 12 laiin hma an hruai fa thei - mahse a tawpah erawh a chungnung zawk chu Lakers an ni.

Lakers tan hian Anthony Davis chuan point 35 a neih bakah rebound vawi 17 a la bawk, point 33 leh rebound vawi 10 latu Russell Westbrook a awm bawk avangin James awm lo mah se an chak thei hram.

Inkhel dangah Golden State Warriors chuan Oklahoma City Thunder chu 106-98 in an hneh ve bawk a, ni dang ang bawkin Stephen Curry chu player pawimawh a ni a, hnehna an chan theih nan hian point 23 a nei.

Golden State hi tun hnaiah an tlahniam, mahse tun season chu bul an ṭan fuh hle. 2015-16 season hnua a vawi khat nan an match hmasa paliah an chak vek, 2015 hi chuan a zawnin match 24 ngawt an chak a nih kha - an record hmasa hi umphak chu a harsa tawh ang.