Pakistan-in New Zealand an hneh

India hnehtu Pakistan-in Thawhlehni zan khan New Zealand chu wicket ngain an hneh a, T20 World Cup Super 12-ah match hmasa pahnihah hnehna an chan avangin semifinal lut turin an dinhmun a ṭha hle.

Sharjah Cricket Stadium-ah Pakistan-in vawm hmasak an thlang a, New Zealand-in 134/8 runs chauh an siam. Babar Azam-a hoten over 18.4-ah 135/5 runs siamin target hi an umpha. Shaheens hian October 29, Zirtawpni zanah Afghanistan an hmachhawn dawn. Black Caps erawh October 31, Pathianni zanah India nen an inkhel

thung ang.

Inkhelh hma boruak
September thla khan New Zealand-in ODI match thum leh T20 match nga khel turin Pakistan an tlawh. Amaherawhchu match khelh ṭan hmain New Zealand sorkarin Pakistan chu a him tawk loa ngaiin inkhelh a ṭhulhtir.

New Zealand thutlukna hi Pakistan cricket tan chuan thil pawi tak a ni a, an sum hloh tur piah lamah ram chhunga cricket hmasawnna nasa takin a tiṭhuanawp thei a ni. Kum 2009 khan Sri Lanka cricket team chu Lahore-ah Islamist hel pawlin an bei chiam tawh a, police mi paruk leh civil mi pahnihin nunna an chan.

Pakistan hi an rama inter-national match thleng thei lo turin kum ruk chhung hrem an ni a, kum 2015 khan Zimbabwe-in an tlawh a, international match an khel leh chauh. New Zealand thutlukna avangin England-in Pakistan tlawh an tum chu an ṭhulh ve leh a, T20 World Cup hmain Pakistan-in hun harsa an tawng.

Phuba chu
Ṭhumvawrah Pakistan an chak a, vawm hmasak an thlang. New Zealand tan T20 World Cup match hmasa ber a ni a, Pakistan erawh inkhel boruak sanga India hneh zo hlim an nih avangin inkhel turin an inpeih.

Inkhelhna hmun Sharjah-ah hian Afghanistan-in Thawhṭanni khan 190 runs zet an siam avangin runs tam hmuh an beisei a, mahse IPL khelh zawh taka runs tlem ṭum ang kha a thleng ta zawk.

Pakistan bowler-te an che ṭha leh a, Shaheen Afridi-a'n wicket khat chauh la mah se 21 runs chauh a pe. New Zealand batsman-te ngam loh chu Haris Rauf a ni a, kum 27 mi fast bowler hian 22 runs chauh pein wicket li a la a, a career-a a chet ṭhat ber ṭum a ni.

New Zealand tan Daryl Mitchell (27), Devon Conway (27) leh Kane Williamson (25) ten run 20 chunglam an siam a, over 20-ah 134/8 runs an siam hram. Amaherawhchu Pakistan-in an target hi awlsam takin an umpha bik lo.

Pakistan captain Babar Azam-a'n run kua chauh a siam a, opener Mohammad Rizwan che ṭha hret mah se 33 runs a siamin pavillion-ah a kir. Over 16 zawhah Pakistan hian 98/5 an siam a, over liah 36 runs siam a la ngaih avangin chak lo thei an ni.

Shoaib Malik (26) leh Asif Ali (27) te an che ṭha a, six leh four runs an vuak chhuah zarah over 18.4-ah Pakistan-in 135/5 runs an siam a, New Zealand lakah phuba an la.

Eng nge an sawi?
Pakistan captain Babar Azam chuan, "Engtik lai pawhin chak hi a pawimawh a, tuna kan inrintawkna hi tun inelnaah chhunzawm zel kan tum ang. Bowling lam che ṭha tho mah ila kha ai khan 10 runs-in kan siam tlem tir theiah ka ngai. Batting lamah bul ṭan fuh lo mah ila Shoaib Malik leh Asif Ali ten a tawp an khar ṭha," tiin a sawi.

New Zealand captain Kane Williamson chuan, "A pawi kan ti takzet. Inkhelh laihawl chhoah khan khan beiseina kan nei a, a tawpah erawh team ṭha tak Pakistan lakah kan chak lo," tiin a sawi.