Santosh Trophy inpuahchahna atan inelna

Assam Rifles chuan vawiin aṭangin Lammualah 'SVV 2021 Football Championship' a buatsaih dawn a, Mizoram team chuan Santosh Trophy atana inpuahchahna atan a hmang ang. Mizoram team-ah hian player 30 an la awm mek a, Assam Rifles inelnaah hian team pahnih Red Team leh Yellow Team-a inṭhendarhin inelna hi an hmachhawn dawn.

Inelnaah hian team pali MFA Red, MFA Yellow, Tata Trusts COE leh Bawngkawn GSA te an tel dawn a, knockout a nih dawn avangin ni hnih chhunga khelh zawh tur a ni. Tukin zing dar 8:00 hian MFA Yellow leh Bawngkawn GSA te an inkhel ang a, tlai dar 3:00-ah Tata Trusts COE leh MFA Red te an inkhel leh ang.

Final hi November 2, Thawhlehni zing dar 8:00-ah khelh a ni dawn. Mizoram team enkawltu pawh team hnihah hian an insemdarh. Yellow team hi K. Lalenghluna leh Samson Ramengmawia ten an enkawl a, Red team hi R. Lalramzauva leh HC Zarzoliana ten an enkawl thung a, physio Eddie Zorinmawia chu team pahnih tan hian a thawk kawp ang.

Mizoram team hian September 27, Thawhṭanni aṭang khan Lammualah training an ṭan tawh a, player 50 vel zet koin tunah hian player 30-ah an thlifim tawh. Santosh Trophy qualifier NE zone hi Khuman Lampak Stadium, Imphal-ah khelh a ni dawn a, Mizoram hi inelna thlengtu Manipur bakah Tripura leh Nagaland te nen group khatah an awmho a ni.