Emma Raducanu a hlim leh ta

US Open champion Emma Raducanu chuan Transylvania Open a match hmasa berah world number 124 Polona Hercog chu 4-6, 7-5, 6-1 in a hneh a, Grand Slam nomawi a chawi hnua a chak lehna hmasa ber a ni.

British tleirawl hian rin loh tak maiin New York khawpuiah hlawhtlinna a chang a nih kha, major title a lak hnua inelna a hmachhawn hmasak ber Indian Wells-ah khan Aliaksandra Sasnovich hneh loin a tla nghal.

Coach nen an inṭhen boruak nen Raducanu hian sawiseltu a nei hman a, media lamin an umzui nasat bawk avangin a buai mai pawh a hlauhawm hman. Mahse, tunah chuan a nihna angin a khel chhuak leh dawn ta niin a lang.

Romania rama inelna neihah Raducanu hi seeded pathumna a ni a, a pa pianna rama hnehna chan hi a nawm dan a dangdai khawp ang, a match lehpekah chuan seeded ni phak lo Ana Bogdan nen an inhmachhawn leh dawn.

Kum 18 mi Raducanu chuan, "Ka khelh danah ka lawm, a pawimawh lai ber chu rilru paukhauh a ni a, tun ṭumah khan chutiang chuan ka ti thei. Tournament pahnihah hneh nei loa tlak nghal kha ka thil hlauh tak a ni.

"Tun ṭumah pawh khan set ka hloh hmasak avangin ka dinhmun a duhawm lo hman, amaherawhchu ka chiai duh lo," tiin a sawi a, a coach Andrew Richardson thlaktu tur a la zawn reng thu a sawi lang tel bawk.