Champion lai Windies an tlawm nawn

T20 Cricket World Cup-ah champion lai West Indies chu England an hneh loh hnuin Thawhlehni zan khan South Africa lakah wicket riatin an tlawm a, semifinal luh a harsa tawh dawn.

Dubai International Stadium-ah Proteas-in vawm hmasak an thlang a, Windies-in bat hmasain 143/8 runs an siam. England lakah Windies hian 55 runs chauh an siam avangin nasa takin hma an sawn tih a lang a, chakpui thamah erawh a ngaihtheih loh.

West Indies tan hian Evin Lewis (56), Kieron Pollard (26) leh Lendl Simmons (16) te chu run siam tam deuh an ni a, Proteas lamah Pretorius chuan 17 runs siamin wicket thum a la.

South Africa opener leh captain Temba Bavuma-a'n 2 runs chauh siam mah se top order ho Reeza Hendricks (39), Rassie van der Dussen (43*) leh Aiden Markram (51*) te an che ṭha. Over 18.2-ah 144/2 runs siamin hnehna an chang.

Inkhelh zawha sawizui hlawh erawh wicketkeeper Quinton de Kock chungchang a ni a, ani hi inkhelh hmaa a ṭhingṭhit ve duh loh avangin Windies hi a hmachhawn ve lo.

Proteas captain Bavuma chuan, "Thil thleng hian min ṭhawng khawp mai. Quinton hi mi putling a ni a, mahnia ngaihdan nei a ni. A thutlukna kan zahsak," tiin a sawi.

June thla khan De Kock chuan, "Ka ṭhingṭhit loh chhan hi sawi chhuah kher ka tum lo. Ka mimal ngaihdan a ni. Tumah hi kan inti lui tur a ni lo, tih hi ka ngaihdan," tiin ṭhingṭhit a tum loh thu a lo sawi tawh.

Cricket South Africa (CSA) chuan, "Player zawng zawngte World Cup match khelh hmabakah thutlukna zawm vek turin kan beisei. Hetia thutlukna kan siam hma hian player zalenna te pawh kan chhut tel vek. South Africa dinhmun thlir kir hian chi leh chi inthliarna titawp tura hmalak hi kan bat a ni," tiin thuchhuah an siam.