Magpies tana Gerrard duhtu Taylor

Newcastle United player hlui Ryan Taylor chuan Magpies chu an coach tura Steven Gerrard be turin thurawn a pe a, Rangers coach chu a club hlui tana ṭha ber tura a ngaih thu a sawi.

Magpies hian neitu thar an neih hnuah coach Steve Bruce chu inhriatthiam tawnnain an thlah liam a, assistant Graeme Jones chuan coach lailawk hna a chelh mek.

Newcastle coach tur hian Gerrard bakah Lucien Favre leh Paulo Fonseca te hming pawh lam rik a ni a, Taylor chuan, "Gerrard te ang hian Newcastle chu enkawl se ka duh takzet. Football player ṭha tak, player ṭha hretu a ni a, Rangers-a a hnathawh a ropui em em bawk.

"Club nen sawizawm a nih a, club-in a duh a nih bawk chuan Gerrard tan chuan Magpies enkawl hi a fuh dawn," a ti a, Liverpool legend chuan fan-tena club an atchilh theihzia a hriatthiam avangin a ṭhat a rin thu a sawi bawk.

Kum 41 mi Gerrard hian season hmasa khan Rangers chu tlawm nei loin league nomawi a chawipui a, Celtic-in rei tak chhung Scottish football an lo thunun tawh chu a titawp.

Tun season Premier-ship-ah pawh Rangers hian match 10 an khelh aṭanga point 23 neiin hma an hruai mek a, nizan khan Aberdeen nen inkhelin result kan hre hman lo.

Hetihlai hian Rangers hian chanchin lawmawm lo an nei a, an coach ropui ṭhin Walter Smith chu kum 73 mi niin a thi. Smith hian Rangers hi ṭum hnih (April 1991- May 1998 & January 2007- May 2011) a enkawl a, nomawi 21 zet a chawipui.

Scottish Premiership-ah vawi 10 zet nomawi a chawi a, Scottish Cup (5) leh Scottish League Cup (6) ah champion in, kum 2008 khan UEFA Cup final a luhpui bawk.

Gerrard-a hoa Rangers-in kumina league nomawi an chawi kha Walter-a'n 2011-a a champion pui hnua Rangers-in league nomawi an chawi leh hmasak ber a ni.

Rangers boss Gerrard chuan, "I finna, ṭawiawmna leh ṭhian ṭha i nihna avangte khan lawmthu ka sawi a, Rangers-a mi zawng zawngte tan chuan an khawvel i ni," tiin Everton leh Scotland pawh lo enkawl tawh Smith hi a thlah.