Fury leh Joshua inhnek tur a chiang hnai

British world heavyweight champion pahnih Anthony Joshua leh Tyson Fury chuan inhmachhawn an remti niin promoter Eddie Hearn chuan a sawi a, boxing fan-te tan chuan lawm avanga zuan tawr tawrna tham a ni!

Kum 30 mi Joshua hian WBA, IBF leh WBO kawnghren a kawl mek a, kum 31 mi Fury hian WBC title a kawl thung. Hearn chuan boxer pahnih hian fight vawi hnih nei turin inremna an nei niin a sawi. 

Hearn chuan, "Joshua leh Fury-te hi sum lamah chuan an inrem fel tawh tiin a sawi theih a ni. Dinhmun ṭha takah kan awm mek a, boxer pahnih hian a thu phung chuan inremna an nei tawh. Fight vawi hnih an nei ang," a ti a, a inringtawk hle. 

Fury chuan social media lamah Joshua nena an inhmachhawnna tur tihfel a ni hnai ta chu lawmawm a tih thu a sawi a, Joshua nen hian kum 2021-ah an in fight tur thu hi a sawi. 

British boxer rothap hian Deontay Wilder erawh a hneh leh phawt a ngai dawn a, February-a WBC title a chhuhsak American fighter nen hian a vawi thum nan an inhnek leh dawn. 

Hetihrual hian Joshua pawhin Bulgarian boxer Kubrat Pulev a hmachhawn ve phawt a la ngai dawn a, anni pawh hi coronavirus boruak a ziaawm huna inhmachhawn tur an ni. 

Hearn chuan, "Fury-a team te nen kan indawr a, keini lam aṭang chuan tihfel ngai apiang kan tihfel tawh thu kan hrilh," a ti a, hetihrual hian tihfel tur tam tak a la awm thu a sawi - inhnekna tur hun leh hmun pawh la sawi fe tur a ni ang. 

Hetihrual hian Fury promoter Frank Warren chuan contract an la ziah loh thu sawi mah se inbiaknaah hmasawnna a awm thu a sawi a, "He fight nghahlelhawm tak hi kan ban phak maiah a awm tawh a, chu chuan minti hlim em em a ni," a ti. 

Warren chuan, "British fan-ten en an châk em em inhnek hi thlentir ngei kan duh a, Tyson-a'n champiomn kawnghren a kawl vek theih nan inbiakna pawh kan kalpui zel ang. 

"Tunah rih chuan fighter pahnih inhmachhawnna tur dal theitu tur chu an hmaa inhnek an hmachhawn tura an tlawm ve ve chauhin a ni," tiin a sawi.