Lewis Hamilton a lawm

Hun rei tak chhung Formula 1 an tlan theih loh hnuah Nilaini zan khan an tlan chhin leh thei tawh a, driver champion lai Lewis Hamilton chuan Covid-19 karah chanchin ṭha lam an nei leh ta chu a lawm thu a sawi.

March thla khan Australian Grand Prix tlan an tum a, inbuatsaihna pawh an nei ngawrh hman hle. Mahse coronavirus vangin an ṭhulh a, inelna nei loin tun thlengin an awm chhunzawm reng.

Tuna an beisei dan chuan July 5 hian tun season chhunga a hmasa ber atan Austrian Grand Prix tlan an tum, he mi atan hian Silverstone tlankawngah Mercedes chuan inbuatsaihna hi an nei.

Mersedes driver Hamilton chuan, "F1 car kan khalh hnuhnung ber aṭanga chhutin ni 103 chhung kan chawl a, chumi hnuah tluang taka kan tlan leh nghal mai thei hi a lawmawm hle. Tlankawng kha huh deuh mah se kei chuan buaina ka neih phah lo," a ti.

Britain tlangval Hamilton chuan a car hman thiam Mercredes WO9 hmangin tlankawng hnawng leh huh deuh chungah harsatna nei loin a tlan kual vel a, season thar atan pawh midang tana elpui hautak a ni leh dawn tih a chiang.

Car intlansiakna sang ber hi world championship pangngai nei tur chuan a tlem berah pawh intlansiak pariat tal an tlan a ngai. Thuneitu lam chuan chawlhkar 10 chhunga tlan turin inelna pariat an ruahman chhin phawt a - Europe khawmualpuiah vek tlan tur niin, a hmuna entu an awm lo ang.