City hmachhawn tur Arsenal an tlawm

Premier League khel tura inbuatsaih mek Arsenal chuan Nilaini zan khan Brentford chu friendly match an khelhpui a, an mikhual lakah Mikel Arteta naute hi 3-2 in an tlawm.

Gunners hian Emirates Stadium-a an inleng Charlton 6-0 in an sawp hlim a ni a, Championship aṭanga EPL khelh tum Brentford lakah erawh player inenchhin kual chungin an chak lo a ni.

Joe Willock hmanga hma an hruai hnuah Alexandre Lacazette-a'n khung belhin Arsenal hi nuamsa taka chak tura ngaih an ni. Mahse mikhual lamin Tariqe Fosu, Halil Dervisoglu leh Shandon Baptiste te hmanga chhang letin hnehna an chang ta zawk.

North London club tlarhnung a pawp. Keeper Bernd Leno chu si ban nghaktu a ni chhunzawm dawn a, a sirah Hector Bellerin leh Kieran Tierney te an dam fel tawh, tlarhnung lai buaina chu chinfel a la ni lo.

David Luiz leh Shkodran Mustafi ten tihsual neih an ching a, player thar Pablo Mari chuan insiamrem turin hun a la mamawh deuh tih a hriat bawk. Kar leh maiah Manchester City an hmachhawn tawh dawn avangin Arsenal tlarhnung a la ngaihtuah awm hle.

Gunners hi league table-a pakuana ni chungin an inlan zui dawn a, palina nilai Chelsea an phak lohna chu point riat lai a ni. An hmachhawn hmabak zingah an chunga awm - Man City, Sheffield United, Wolves, Leicester City, Tottenham leh Liverpool te an awm avangin a hautak dawn.