Timo Werner te inkhelh zan

Zanin dar 12:00 hian Timo Werner-a khelhna RB Leipzig-in Hoffenheim khelmual Rhein-Neckar-Arena an tlawh ang. German striker Werner hi English club nen sawizawm an ni a, thawm nei ring ber Chelsea ṭantute tan chuan Leipzig inkhel en a châkawm sawt ang.

Bundesliga-ah RB Leipzig hian point 59 hmuin pathumnaah an awm a, amaherawhchu panganaa awm Bayer Leverkusen aia point thum chauha an san avangin chak ngei an mamawh.

Hoffenheim erawh tun hnaia an chet ṭhat loh avangin Champions League beisei ngam chi a ni tawh lo a, chutihrualin result ṭha duhin coach Alfred Schreuder an ban tih hriat a ṭha.

Hoffenheim hian club top scorer Andrej Kramaric chu March thla hnuah an chhawr leh thei tawh dawn a, Croatian striker hian inhliam vanga match 15 chauh a khel chungin goal sarih a khung. Hoffenheim tlarhnung lamin Werner an ven uluk ang thoin RB Leipzig lamin Kramaric hi an ven uluk a ṭul ang.

RB Leipzig boss Julian Nagelsmann hian Hoffenheim aṭangin bul a ṭan a, amah chher liantute mualah a let dawn. Coach naupang Nagelsmann hian Leipzig hi 44% a chak pui a, club record a ni pha. Hoffenheim erawhin Nagelsmann awm loh an tuar a, Alfred Schreuder  hnuaiah an tum ram an thleng zo lo.