Iannone-a'n hrem a nihna a khinglet

Damdawi hman phal loh a hmang tih an hriat vanga hrem lai Andrea Iannone chu Court of Arbitration for Sport hnenah a zualko a, infiamna lama thubuai ngaihtuahtu sang ber CAS hian thubuai an ngaihtuah hun tur an la tichiang lo.

MotoGP rider hi nikum November 3-a tlan zawh tak Malaysian Grand Prix an tlan ṭum khan a zun (urine) an endikah damdawi hman phal loh a hmang tih hriat a ni. Kumin April thla khan International Motorcycling Federation (FIM) chuan thla 18 chhung atan hremna hi an tichhuak.

Infiammiten damdawi hman phal loh an hmang nge hmang lo endiktu World Anti-Doping Agency (WADA) pawh an ngawi bik lo. Thla 18 atana hrem lai Iannone hi kum li chhung hrem a nih theih nan CAS hnenah an lo thlen ve bawk.

CAS chuan, "Andrea Iannone chuan hrem a nihna hlip turin thu a thlen a, chutih lai chuan WADA lamin a hrem hun chhung ti rei turin thu an thlen bawk. A thubuai ngaihtuah hun tur erawh a hrana tih chhuah leh a la ni ang," an ti.

Season hmasa khan kum 30 mi Iannone hi rider championship-ah 16-na a ni, intlansiak hnuhnung pahnih Malaysia leh Valencia Grand Prix-a a result te chu sut lehsak a ni.

Italian team Aprilia tan Iannone chanchin hi hriat nuam a ni lo. An rider pakhat zawk Aleix Espargaro erawh kum 2022 thleng daih contract thar an ziahpui thung.