Mualpho takin Bayern an chak lo

DFB Pokal-ah Bayern Munich-in Nilaini zan khan Borussia Monchengladbach an hmachhawn a, 5-0 in an mualpho. Bavarians hian a zawnin season hnih chhung German Cup second round-ah an tla a, kum 1978 hnua an chak loh chian ber ṭum a ni.

Borussia-Park-ah Kouadio Kone-a'n minute hnihna lekah goal hmahruai a khung a, Ramy Bensebaini leh Breel Embolo ten goal hnih ve ve an khung belh. German champion Bayern-in a chhanletna an nei lo.

Team ṭha

German Cup-ah Bayern Munich-in player ṭha an luhtir a, tlarhmaah Robert Lewandowski thlawp turin Leroy Sane, Thomas Muller leh Serge Gnabry te an awm.

Midfield-ah Leon Goretzka leh Joshua Kimmich te an inkawp a, tlarhnungah Aphonso Davies, Lucas Hernandez, Dayot Upamecano leh Benjamin Pavard te intlarin Manuel Neuer-a'n si ban a nghak.

Bayern hian tun season-ah anmahni elpha ve tura ngaih RB Leipzig (4-1), Bayer Leverkusen (5-1) leh Hoffenheim (4-0) te an sawp a, Europe-a an khingpui Barcelona (3-0), Dynamo Kiev (5-0) leh Benfica (4-0) te an sawp vek. Amaherawhchu Bundesliga match hmasa bera 1-1 an inhnehtawkpui Gladbach lakah an mualpho ta thung.

Mualphona chu

Minute hnihna lekah Aphonso Davies-a pass sual hmang ṭangkaiin Glabach midfielder Kone leh forward Embolo ten Bavarians tlarhnung an ṭhiat a, French midfielder Kone hian goal hmahruai a khung.

Goal hnihna luh dan erawh tumah dem theih a ni lo a, Gladbach passing mawi tak fak mai a finthlak. Minute 15-naah Jonas Hofmann cross chu Ramy Bensebaini-a'n goal hnihna khung nan a hmang.

Bavarians defender Hernandez a chesual a, Embolo lakah penalty a chawi. Minute 21-naah Bensebaini-a'n penalty hi goal-ah a chantir a, first half-ah 3-0 a ni.

Second half-ah Hernandez leh Upamecano te inringthul chu Embolo-a'n a hmang ṭangkai a, minute 51-naah ṭha zetin a pet goal. Swiss forward Embolo hian Bavarians mangchhia belhchhah nan minute 57-naah substitute kum 19 mi Luca Netz pass chu a pet goal leh bawk.

Kum 43 hnuah

Bayern Munich hian kum 1978 khan Fortuna Dusseldorf chu Bundesliga-ah 7-1 in an hneh loh a, tun ṭum hi hemi hnua goal nga china an chak loh lehna hmasa ber a ni. Kum 43 hnua a chak loh chian ber ṭum ni mah se an chak loh nasat ber ṭum erawh kum 1976 a thleng kha a la ni reng a, Schalke lakah 7-0 in an chak lo.

German champion coach Julian Nagelsmann-a'n Covid-19 a kai avangin Gladbach nen hian team a la ho thei lo. Club sporting director Hasan Salihamidzic chuan, "A mak takzet. First half-ah khan kan che thei hlol lo a, khelh ngaihna kan hre lo a ni ber," tiin an chak loh dan chungchang a sawi.

Bavarians ngam loh Glabach hi tun season-ah an talbuai ve hle. Bundesliga match kua an khelh tawhah point 11 chiah an la hmuh avangin table-ah 12-naah an awm mek.