Rayo laka tlawm man a tam; Barca-in Koeman an ban

Barcelona chuan Nilaini zan khan Spanish La Liga inkhelah Rayo Vallecano chu 1-0 in an ngam lo a, coach Ronald Koeman an ban zui.

Rayo tan striker chuai thei lo Radamel Falcao chuan inkhela goal awmchhun hi a khung a, kum 35 mi striker tun season-ah league match ruk khelin goal li a khung ta a, a minute ang zawnga chhut chuan minute 62 dan zela goal khung ang a ni!

Barcelona tan Memphis Depay chuan penalty aṭangin si phurh sutna hun remchang nei mah se goal-ah a chantir thei lo a, Dutch forward hian pet goal ngat se chuan Koeman dinhmun a danglam mai thei.

Inkhelh zawhah Koeman chu result-in a hma hun a tihbuai a rin leh rin loh zawh a ni a, "Ka hre bik lo," tiin a chhang - a hnu minute rei lotêah khawvelin a dinhmun a hrechiang ta thung.

Hello, ban i ni!

La Liga kai thar Rayo Vallecano khelmualah Barca an tlawm a, club president Joan Laporta-a'n inkhel tawp ruala phone hmanga a biak hmasak ber chu Koeman a ni.

Laporta hian Koeman hi phone hmangin a bia a, Barcelona coach aṭanga chawlhtir a nih thu a hrilh. Barca chuan thuchhuah siamin, "Ronald Koeman hian Ninganiah squad a mangṭha ang," an ti.

Barcelona president thar Laporta hi Koeman ngainatu a ni lo. Catalan club hruaitu atana thlan a nih aṭangin Dutch coach dinhmun hi a derthawng nghalah ngaih a ni a, kar hmasa thleng khan ban a nih tur thu sawi rik a ni.

Mahse, Barca-in sum an nei lo a, Dutch coach an ban ngawt ngam lo - an ban chuan zângnadawmna pek a ngai dawn a, coach thar rawih nan sum tam tak sen belh a ngai dawn bawk. Heng zawng zawng ngaihtuah hian Barca an insum hram hram a, a tawpah erawh an tlin ta ngang lo.

Beiseina

Netherlands international hlui Koeman hian 1998-95 inkar khan Barcelona tan a lo khel tawh a, nomawi chawi theih ang chu a chawi deuh vek. Defender goal khung thei tak a ni a, Barca tan hian match 264-ah goal 88 a khung thei!

August 2020 khan Netherlands enkawl mek mah se khatihlaia Barca president Josep Maria Bartomeu chuan Catalan club enkawl turin a thlem lut a, Barca kalphung hrechiang sa a nih avangin a chungah beiseina sang tak a awm.

Koeman hian a hna hmasa berah squad ṭhuahfai chu a nei a, Barca legend Luis Suarez chu phone call hmanga biain, mamawh a nih tawh loh thu a hrilh a, an inbiakna hian second 40 bak a awh lo.

Suarez bakah hian player langsar zingah midfielder Ivan Rakitic, Arturo Vidal leh defender Nelson Semedo te a chhuahtir bawk a, player langsar lakluh erawh a nei lo thung.

A tak ram

Koeman-a'n Barca dinthar tum viau mah se suangtuahna leh a tak ram chu inthlau tak a ni - Barca-a a season hmasa berah Atletico Madrid leh Real Madrid tluk loin league-ah pathumna an ni a, Copa del Rey-ah champion nomawi an chawi ve hram.

Hetihlai hian langsar taka duh loa a chhuahtir Suarez-a'n league match 32-ah goal 21 khungin Atletico a champion pui a, season hmasa khan Barca player zingah Lionel Messi (30 goals) tih loh chu Uruguayan striker goal khung ang zat khung thei an awm lo.

Season a liam a, nipui transfer a inher chhuak - mahse, Barca buaina a lang chiang tawlh tawlh. Koeman-a'n nipui transfer-ah player leina tur sum a nei lo a ni mai lo a, an neihsate hlawh pek tur pawh a awm meuh lo - chhuah ṭhentir an ngai.

Messi-a'n a hlawh 50% zeta tihniamin contract thar a ziak dawn nia sawi ni mah se a tawpah chuan Catalan club-in Argentine forward chelh turin sum an nei lo a, kum hnih liam ta maia pound maktaduai 107-a an lei Antoine Griezmann pawh a club hlui Atletico Madrid lamah loan-a kirtir a ni.

A pawi zo ta

Messi tel lohna Barca an hniam tual tual a, Koeman ngei pawhin Messi tel loa Catalan club an chhiat sawt thu a pha lo. Messi, Suarez leh Griezmann inkawptir thei club khan Depay, kum uaithla tawh Aguero leh loan-a an hawh Luuk de Jong te ho an inkawptir a, an inthlau hret chu a ni!

Rayo laka an tlawm avangin league-ah pakuana an ni a, match 10 ve ve khelh tawhah he thu buatsaih laia hmahruaitu Real Madrid chu point rukin an phak lo a, Champions League match thum khelh tawhah point thum chiah an la nei bawk.

Kum 58 mi Koeman-a'n inkhelh zawhah, "League-a kan awmna hian kan dinhmun a ṭha lo tih a pholang. Squad a inkhairual tawk lo a, player ṭha tak tak kan chân a, kan result-in kan tuar tih a pholang. Tun hnaiah club dang chu an inthuam ṭha reng a, keini erawhin kan ti ve thei lo a, chu pawh kan tuar tih a lang," a ti a, ṭawng a insum bik lo.

Thil dangdai ve tak chu October 27, 2020 khan Koeman laluttu president Josep Bartomeu chu Barca hotu a nihna aṭangin a bang a, a lakluh Koeman chu October 27, 2021-ah Barca coach aṭangin ban a ni ve leh thung.

Tu thiam loh nge?

Everton leh Southampton pawh lo enkawl tawh Koeman hi fans tam tak chuan an team mualpho chhanah an puh a, El Clasico-a an tlawm hnu khan fans ṭhenkhat chuan a car an din hual hial.

Koeman chuan, "Mimawl, thil nihphung leh kalphung pawh hre lo an ni," tiin amah tibuaitu fans ṭhenkhat a sawisel zui a, player a nih laia club legend khan a hmingṭhatna chu zawi zawiin a mangṭha.

Chutihrual chuan Koeman hi Bartomeu hunlaia uchuak taka an sum sen tuartu a ni a, Catalan club tlakchhiat lai taka coach a ni hi a vanduai ve bawk - Messi leh Griezmann te transfer bazar khata chante hi tlakchhiatpui tham chu a ni hrim hrim.

Club president Laporta hian fan-te rilru neih tum viau mah se a thiam loh a ni ve tho bawk - campaign au hlaa Messi a chelh tur thu sawitu hian Messi a chelh lo a, Bartomeu sulhnu pawr chingfel turin a che chak tawk lo bawk a, a tawpa tuartu chu coach Koeman a ni.

Hello Xavi

Tun dinhmuna Barca coach thar ni tura hming sawi rik ring ber chu Xavi a ni. Barcelona chuan Qatari club Al Sadd enkawltu hi inbiakna an neihpui mek a, he thuziak i chhiar meuh chuan an inbe fel tawh hial mai thei.

Barca hian kum 41 mi coach hi Koeman an ban hma khan an lo be lawk daih tawh a, result a zira Dutch coach ban turin an lo inpeih hle tawh tihna a ni.

May 2019 khan Xavi hian Al Sadd hi a enkawl ṭan a, Qatar Stars League, Qatar Cup, Qatari Super Cup leh Emir of Qatar Cup-ah te a champion pui tawh a, kum 2023 thleng cham turin contract nei mah se Qatar club hian an chhuah theih a rinawm.

Barcelona hian Inrinni zan dar 11:30-ah league match khel turin Alaves an mikhual dawn a, Xavi hi an la la fel hman lo a nih chuan Barcelona B team coach Sergi Barjuan chuan enkawl lailawk hna a lo thawk ang.