Final-ah Mizoram team pahnih

Assam Rifles buatsaih SVV 2021 Football Championship-ah Mizoram team pahnihin final an lut a, nomawi inchuhna hi November 2, Thawhlehni zing dar 8:00 hian Lammualah khelh a ni ang.

Santosh Trophy atana inbuatsaih mek Mizoram hi team hnihah an inṭhen a, nimin zing khan Lammualah Yellow Team-in Bawngkawn GSA chu 7-2 in an hneh. Mizoram tan hian Lalfakzuala'n hattrick a siam bakah Lalhriatpuia'n goal hnih a khung a, David Lalchhuanawma leh MS Dawngliana ten goal khat ve ve an khung bawk.

Nimin tlai khan Mizoram Red leh Tata Trusts COE te an inkhel ve leh a, Red Team hian 3-1 in hnehna an chang. Mizoram tan hian Lalrinchhana Tochhong, Lalrinzuala Hauhnar leh Vanlalthanga ten goal khat ṭheuh an khung - inkhel hi entu awm loa kalpui a ni

Mizoram team hian October 30, Inrinni tlai dar 2:00-ah I League khel tura inpuahchah mek Aizawl FC nen RG Stadium-ah practice match an khel leh ang.