Getafe leh Valencia ten UCL beisei
Covid-19 vanga inelna chawlh a nih hnuah La Liga chu nizan khan khelh ṭan a ni a, zanin hian match hnih a awm chhunzawm dawn. Zanin dar 11:00 hian Getafe-in Granada an tlawh ang a, dar 1:30-ah Valencia-in Levante an mikhual ang. Getafe leh Valencia te hian Champions League khelh an la beisei ve ve.
UCL hmunruak
La Liga-ah Barcelona leh Real Madrid te chiahin nomawi an beisei tawh a tih theih tawh a, club lian pahnih hi Champions League khel turin an dinhmun a ṭha bawk. UCL khel tura hmunruak pahnih dang erawh Sevilla, Real Sociedad, Getafe, Atletico Madrid leh Valencia tan a la inhawng tiin a sawi theih.
Match 27 khelh zawhah pasarihna Valencia (42) hian pathumna Sevilla (47) hi point nga chiahin an pha lo a, team dinhmun hi match hnih khat leka danglam thei a ni a. Getafe hian point 46 an hmu a, palina Real Sociedad nen an point hmuh zat a inan avangin Champions League khel turin ṭan mar a la ṭul hle.
Engtin zel?
Getafe hian match hnuhnung pali aṭangin point li chauh an hlawh chhuak a, Barcelona leh Sevilla an hneh loh bakah an match hnhnung berah Celta Vigo nen March 8 khan an inhnehtawk. Thla thum hnuah Getafe hian Granada an hmachhawn dawn a, a sang pali zinga tel an tum a nih chuan chak ngei ngeina tur inkhel a ni.
Valencia pawh an match hnuhnung pangaah vawi khat chauh an chak a, chak loh leh inhnehtawk vawi hnih ve ve an nei. Champions League lamah Valencia hi an mualpho a, Italian club Atalanta lakah 8-4 zetin an chak lo. Season tharah UCL lama inlan tur chuan Levante lakah point thum hlawhchhuah a pawimawh ang.