Mizoramin bronze medal pahnih an la

5th Elite Women National Boxing Championship chu October 21-27, 2021 chhung khan St. Joseph's International School, Hisar, Haryana-ah neih a ni a, Mizoram aṭangin Kroshmangaihsangi leh Lalfakmawii Ralte ten bronze medal an la.

Mizoram Boxing Association (MIZBA) in tun ṭum inelnaah hian boxer panga an tir a, Saron Veng nula Kroshmangaihsangi (57 - 60 Kg) leh Vaivakawn Zohnuai nula Lalfakmawii Ralte (75 - 81 Kg) te hmangin medal an hawn.

Mizoram aiawha kal zingah Muthi nula Rebecca Lalinmawii'n (50-52 Kg) quarterfinal a thleng bawk a, medal la pahnih te nen hian National Games khel turin an tling. Abisag Vanlalmawii, Vaphai (60-63 kg) leh PC Lalremruati, ITI Veng (64-67 kg) te erawh an vanduai thung.

Mizo nula pahnih Vanlalduati, Khawbung leh Lalbuatsaihi, Bethlehem te All India Police hmingin an tel a, quarterfinal lut ve vein National Games khel turin an tling bawk.

Mizoram coach B. Lalhriatpuii chuan, "Kan naute thlen chinah kan lawm a, hmasawnna tur pawh a la tam khawp mai. Railways leh Haryana te an ṭha fal a, anni el ve thei tur hian ṭan kan lak a ṭul a ni," tiin Vanglaini a hrilh.