Apuia telna India an tlawm

Kum 2022 AFC U-23 Asian Cup khel tur zawnna qualifier-ah Nilaini zan khan India an tlawm a, Mizo tlangval Lalengmawia telna India Under 23 hian 1-0 in UAE U23 chu an ngam lo.

Goal awmchhun hi minute 82-naa Abdulla Idrees-a'n penalty hmanga a khung a ni a, Suresh Singh-a'n Ali Saleh a tih tluk avangin penalty hi a chawi. Manipur midfielder hian minute thum hnu lawkah si phurh sutna chance nei zui mah se crossbar chungah a thlawh.

India coach Igor Stimac-a'n goal khung beiseiin Rohit Danu leh Aniket Jadhav luhtir zui mah se India goal chhuah a tlai hret a, si phurh sut turin hunin a daih tawh lo.

Blue Tigers hian an match hmasa berah 2-1 in Oman chu an lo hneh tawh a, India tana SAFF Championship khel chau Apuia chu bench-ah a ṭhu tluan.

Inelna thlengtu UAE lakah Vaivakawn tlangvalin bul a ṭan thung a, mahse, an chak zo lo - group E-ah India hi UAE, Oman leh Kyrgyzstan te nen an awm ho a, point thum vek an nei.

Group 11 aṭangin group tina hmahruaitu ṭheuh chu Asian Cup U23 khel tura tling tur an ni a, pahnihna ti ṭha pali an lut bawk ang - group E a ngaihnawm a, Inrinniah India hian Kyrgyzstan nen an match tawp ber an khel dawn a, an chak loh chuan nakkum January-a Uzbekistan-in a thlen tur AFC U-23 Asian Cup ah inlan lohna chance a sang hle.