League Cup champion lai Man City an tla

Manchester City chuan League Cup nomawi an hum thei dawn ta lo. Pep Guardiola hote hian Nilaini zan khan West Ham lakah goal an khung thei lo a, 0-0 a an inhnehtawk hnuin penalty shootout-ah 5-3 in an chak lo.

London Stadium-ah Pep Guardiola-a'n a chhawr tam loh Oleksandr Zinchenko, Nathan Ake, Zack Steffen leh John Stones bakah rawlthar duhawm Cole Palmer ten bul ṭan mah se Kevin de Bruyne, Riyad Mahrez, Raheem Sterling leh Kyle Walker te bul ṭantu zingah an tel avangin chak turin an la ṭha tawk.

Man City-in inkhel an thunun a, ball possesion 75% zet an chan bakah goal shot pawh vawi 25 nei mah se goal zawnah vawi sarih chiah a kal a, minute 90 chhungin goal an khung thei lo. City keeper Steffen-a'n hna a nei lo.

Hammers goalkeeper Alphonse Areola a che ṭha a, extra time a awm loh avangin penalty hmangin chak zawk an zawn a ngai. West Ham-in penalty an pet hmasa a, Mark Noble-a'n mualpho taka Manchester United laka penalty a hlah hnuah chiang takin goal hmasa ber a khung.

Man City tan erawh rawlthar duhawm Phil Foden-a'n goal zawnah a pet thei lo. Hammers tan Jarrod Bowen, Craig Dawson, Aaron Cresswell leh Said Benrahma ten an khung vek a, Man City tan Joao Cancelo, Gabriel Jesus leh Jack Grealish ten khung mah se David Moyes-a hote 5-3 in an chak.

Pep Guardiola chuan, "Hun rei tak kan chak tluang rei a, penalty-ah erawh an ṭha zawk. West Ham ka lawmpui a, season tarah ṭha zawkin kan rawn kir ang," tiin a sawi. League Cup hi Spanish manager hnuaia Man City-in nomawi an chawi hmasak ber a ni a, inelna hnuhnung palia an champion bakah inelna hnuhnung parukah vawi nga an champion a ni.