An mualah Juventus an tlawm

Juventus an kal fuh hleithei rih lo, an dinhmun an siamṭha dawn ṭan niin lang mah se an mualpho leh ta. Old Lady hi an mikhual Sassuolo lakah 2-1 in an tlawm a, an tan league nomawi chu beisei san a harsa tawh ang.

Nilaini zan Serie A inkhel danga champion lai Inter Milan chuan Empoli chu si hnih faiin an luh chhuah a, thawm nei lian AS Roma pawh an manager Jose Mourinho-a'n kaihruai thei lo mah se Cagliari mualah 2-1 in an chak.

A vawi thumna

Allianz Stadium-a inkhel an ni a, an player neih dan khaikhin pawhin Juventus hi chak tura ngaih an ni. Mahse, chawhlawk hmain mikhual lamin Davide Frattesi hmangin goal an khung chu Weston McKennie-a'n sut mah se hun tawp dawna Maxime Lopez goal hmangin Sassuolo an chak.

Juve hian tun season Serie A match 10 an khel tawh, chung zingah chuan vawi thum an tlawm der tawh, ṭum thum dang chu an khingpuite nen an inhnehtawk bawk - Massimiliano Allegri naute hi an harh chhuak thei meuh lo chu a ni.

Italian manager Allegri chuan, "Team kan ni tih kan hriat a ngai, a bik takin a tawp thleng kan beih a ngai tih kan hriat thar leh a ṭul. Inkhel kha ngun takin ka en a, taksa lam chuan rilru put hmang dik kan mamawh zawk tih a lang.

"Sassuolo khan mahni inveng thiam tak chungin min bei, counter attack hmanga min nawr letna kha kan dawl zo lo ṭhin. Juventus hian tun ṭuma kan goal chhuah ang kha ni dangah kan chhuah ngai lo," tiin a naute khelh dana a lawm loh thu a sawi.

Inter an chak

Juventus nena an inhnehtawk hnuah Inter Milan chuan chak ni hmel an hmu chhunzawm nghal. Danilo D'Ambrosio leh Federico Dimarco te goal hmangin Empoli chu 2-0 in an luhchhuah a, hmahruaitu AC Milan an thlahfal duh bik lo.

Empoli hian penalty beisei mah se pek an ni lo a, minute 52-naah an midfielder pawimawh Samuele Ricci chu hnawh chhuah a ni bawk. Ricci-a'n red card a hmuh hian goal khat an phur tawh, team nem zawk ni chunga player an tlem zui avangin tih theih an nei ta lo a ni.

Inter hi an coach Simone Inzaghi-a'n a hmunah a ho thei lo. An match hmasa zawkah Inter hian hun tawp dawnah penalty an chawi a, a duh lohna nasa taka a lantir vangin Inzaghi hi hnawhchhuah a ni a, kar tawpa Udinese an mikhual hunah chuan khelmual sirah a ṭhu thei tawh ang.

Serie A match 10 aṭangin Inter hian point 21 an hmu a, table-ah pathumna an ni. Hmahruaitu AC Milan nen khelh zat inangah point sarihin an inthlau mek a, champion lai tan nomawi humhim tur chuan chet sual a rem tawh meuh lo a ni.

Inkhel dang

Match khat atan Jose Mourinho an hrem a, a naute inkhel a hmunah kaihruai thei lo mah se AS Roma manager hian stadium pawnah a naute hnehna chang zo hi a lo nghak! Roma hian Cagliari 2-1 in an hneh a ni.

Roma hian second half tir lamah goal an chhuah a, 1-0 in an hnufual. Mahse, Ibanez leh Lorenzo Pellegrini te hmangin an chhang let a, chakna goal an khung chiah chuan TV lamin Mourinho an hmu fuh a, a ṭhut hmunah uar zetin an goal hi a lawm.

Inkhel dangah Maurizio Sarri enkawl Lazio chuan Fiorentina 1-0 in an hneh, goal awmchhun hi minute 52-naah Pedro khung a ni. Hnehna an chan hnuah Sarri chuan tun season chhunga an khelh ṭhat ber ṭum a nih thu a sawi.

Sarri chuan, "Inter leh Roma pawh kan hmachhawn tawh a, chung zawng ai chuan tum ṭum hi kan khelh ṭhat ber ṭum niin ka hria. Tlarhnung phui leh khawng ṭha neih tumin hma kan la, a takin a chhanna kan hmu thei hi ka lawm hle," tiin a sawi.