Murray hnehtu Alcaraz

Vienna Open khelh laiah Andy Murray chu Carlos Alcaraz hneh loin last 16-ah a tla, a hliam a dam hnuah ṭha takin khel thei leh tawh mah se Murray tan sang tak thlen erawh a la harsa rih tih a lang.

Murray hian 2014 leh 2017 khan Vienna Open nomawi hi a lo chawi tawh, sulhnu ṭha a neihna hmun a nih avangin a match hmasa lamah pawh a ṭha ṭha viau. Mahse Spanish tlangval lakah hian 6-3, 6-3 in a tlawm zawkah a ṭang.

Set hnuhnung zawkah Murray hian a tir lamah a khingpui service a chhuhsak a, a dinhmun pawh a ṭha hman viau. Mahse, game hnuhnung panga zinga pali ngawt latu Alcaraz chu dan theih a ni lo.

Kum 18 mi Alcaraz chuan, "Indian Wells-ah khan a vawi khat nan Andy Murray nen hian kan lo inhmachhawn tawh, tunah chuan kan inkhelh hmasak aiin a khelh dan phung ka hre tawh zawk," tiin a sawi.

Inkhel dangah seeded pasarihna Jannik Sinner chuan Reilly Opelka 6-4, 6-2 in a hneh a, seeded pariatna Diego Schwartzman pawhin Fabio Fognini chu 6-2, 7-5 in a hneh

ve bawk.

Season hmasa finalist Lorenzo Sonego pawh a la chak zel. Nikuma Novak Djokovic hnehtu Senogo hian Dominik Kopfer chu 6-4, 6-3 in a hneh a, inkhel dangah Gael Monfils pawhin Lorenzo Musetti chu 7-6 (2), 6-4 in a hneh ve bawk a ni.