England an chak nuamsa

T20 Cricket World Cup-ah England-in Nilaini khan Bangladesh chu wicket riatin an hneh a, Three Lions hian vawi hnih khelhah vawi hnih chakin hmahruaitu an ni. Group khatah hian team paruk an awm a, vawi khat ṭheuh an inkhelh kual hnuah a sang pahnihin semifinal an lut ang.

Sheikh Zayed Stadium-a inkhelah ṭhumvawra chak Bangladesh-in bat hmasak an thlang a, Tigers top order ho an chesual. First round-a che ṭha zet team innghahna ni bawk Shakib Al Hasan-a'n run li chauh a siam a, Mushfiqur Rahim (29) leh captain Mahmudullah (19) te zarah over 20-ah 124/9 an thleng hram.

England tan bowler Tymal Mills a che ṭha a, wicket thum lain 27 runs a pe. Chutihrualin opener pahnih Liton Das (9) leh Mohammad Naim (5) vawm hlumtu Moeen Ali-a'n (18/2) fak a phu bawk. Three Lions opener Jason Roy-a'n 61 runs a siam a, Dawid Malan (28*) leh Jonny Bairstow (8*) ten harsatna nei loin a tawp an khar - over 14.1 lekah 126/2 runs siamin hnehna an chang.

October 30, Inrinni zanah England hian Australia an hmachhawn dawn a, Eoin Morgan hote hian Aussies hi an hneh thei a nih chuan semifinal kawng zau takin a inhawng ang.