A thiam pariat zingah Liverpool & Spurs

League Cup quarterfinal lut turin Liverpool chuan 2-0 in Preston North End an hneh a, Tottenham Hotspur chuan Premier League club tum mah se 1-0 a Burnley hnehin a thiam pariat zingah an tel ve bawk.

Reds tan Takumi Minamino leh Divock Origi ten goal khat ve ve an khung a, Origi goal khung hi 'scorpion kick' niin goal mawi bik a ni. Spurs tan Lucas Moura chuan inkhela goal awmchhun a khung a, Burnley zinkawng an tihtawpsak.

League Cup quarterfinal-ah Arsenal, Brentford, Chelsea, Leicester City, Liverpool, Sunderland, Tottenham Hotspur leh West Ham an tling a, Inrinniah quarterfinal-a inhmachhawn tur draw neih a ni ang.

Preston an hlauhawm

Jurgen Klopp-a'n 5-0 ngawta Manchester United an sawp ṭuma bul ṭantu player 11 a thlak danglam hlawk a, first half-ah a tisual dawn emaw tih turin an khel hman - Championship club Preston an hlauhawm zawk.

Liverpool tan goalkeeper Adrian a che ṭha takzet a, Sean Maguire khung tur nia lang a dante chu pui tak a ni - Ryan Ledson, Brad Potts leh Tom Barkhuizen te pawhin chance duhawm an hlah ve bawk.

Klopp-a'n insiamṭhat a ngai tih hriain kum 18 mi right back Conor Bradley a luhtir a, Neco Williams chu goal nawr pui turin a tawlh hmatir thung.

A par ta

Reds manager Klopp-a'n thutlukna a siam fuh. Neco a tawlh hma hnuin Liverpool an hlauhawm sawt - minute 62-naah kum 20 mi defender hian Minamino tan a siamsak a, Japanese forward hian ṭha zetin goal-ah a chantir.

Kum 26 mi Minamino hian tun season-ah league match la khel lo mah se inelna danga match thum a khelh aṭangin goal thum a khung ta. Hun tawp nan minute ruk chiah a awm tawh tihah Origi-a'n mawi zetin a kheng goal ve leh a, kum 26 mi forward hian tun season match nga a khelha goal hnih a khungna a ni.

Klopp chuan, "Kan khel ṭha tawk lo. A tirah kan zia viau a, mahse, kan kalphung kan hloh leh vat a ni ber. Team ang chuan hei aia ṭha zawka khel thei kan ni a, mimal anga khel ṭha tak tak erawh ka hmu. A pawimawh ber chu chak a ni a, chu chu kan puitlin a ni," a ti.

Spurs chak hram

Tottenham boss Nuno Espirito Santo-a'n Harry Kane bul ṭantir mah se goal khung turin minute 68 an nghah thlen a ngai a, bench aṭanga luhtir Lucas Moura chuan Emerson Royal siamsak chu goal-ah a chantir.

Goal luh hma hian Giovani lo Celso chuan chance duhawm a nei a, mahse, Clarets goalkeeper Nick Pope chuan ṭha zetin a dansak - Kane chuan a chance neihte a chhawr thei lo bawk.

Nuno chuan, "Chak kan phuin ka hria. Hun harsaah pawh talbuai loh hi a pawimawh chu a ni a, kan hna ṭha taka kan thawh avangin ka player-te hi kan lawmpui tur a ni," tiin an result-a a lawm thu a sawi.