Lloyd-i'n US jersey a khai ta

World Cup vawi hnih leh Olympic gold medal latu Carli Lloyd chuan ram tana a inkhelh a chawlhsan thu a puang a, kum 39 mi United States forward hian ram tana a match hnuhnung berah Nilaini khan South Korea 6-0 in an sawp.

Lloyd hian ram tan match 316 a khel a, United States kawr a hak hnuhnun berah hian minute 65-naah an thlak. World Player of the Year vawi hnih ngawt ni tawh Lloyd hian khelmualah a boot a phelh a, a ṭhiante a kuah kual hnuah Allianz Field, Minnesota-a inkhel entute zahna chibai a buk.

US hmeichhe team chuan, "Ram tana kum 17 chhung a khelh hnuah Carli Lloyd chuan a tawp nan USWNT kawr nen khelmual a chhuahsan. Carli, kan lawm e," tiin thuchhuah an siam.

Kum 39 mi Lloyd hi hmeichhe football player ropui ber zinga mi a ni a, July 10, 2005 khan United States tan a khel ṭan a, match 316 aṭangin goal 134 a khung.