Westbrook an hnawtchhuak

Los Angeles Lakers chuan point 26 zeta hma an hruai fal tawhna an chhawr thei lo. Nimin zing NBA regular season inkhelah Lakers hi Oklahoma City Thunder lakah 123-115 in an chak lo, an player pawimawh Russell Westbrook chu hnawhchhuah (eject) a ni.

Lakers hian quarter hnihna khelh laiin 56-30 zetin hma an hruai fal hman, mahse third quarter an khelh meuh chuan Thunder hi 97-95 in an chungnung let daih tawh, a tawp thlenga ṭang rei peih zawkin hnehna an chang.

Westbrook-a'n Lakers tan a vawi khat nan triple-double (20 points, 14 rebounds & 13 assists) a nei. Amaherawhchu, turnover vawi 10 ngawt a nei a, technical foul vawi hnih a nei avangin hnawhchhuah a ni bawk.

Lakers hi an tham-puipa LeBron James chu ke rek hliam vangin a la inlan thei lo. Anthony Davis-a'n point 30 zet nei bawk mah se chakni hmel an hmu zo lo a, season tir an match panga aṭanga vawi thum ngawt an tlawm tak avangin insiamṭhat an mamawh hle.