Australian Open a chiang thei lo

Tennis player tan Australian Open an khel thei dawn nge dawn lo a chiang hleithei lo. Hripui laka invenna vaccine la kim tawh tan buaina a awm lo a, chutih rualin invenna la ve lote dinhmun tur a chiang thei lo chhunzawm.
Australian sorkar hian vaccine la lo chu visa an pek loh tur thu an sawi tawh. Tun kar tir lam khan hmeichhe tennis thuneitu sang Women's Tennis Association chuan vaccine la lo pawh ni 14 chhung khung hran ni chung an inlan theih tur thu an sawi.

Mahse, tunah chuan Melboure Park awmna Victoria state thuneitu Daniel Andrews a rawn ṭawng chhuak ta, "Vaccine late chungah lawmthu ka sawi, vaccine la lote erawh an dan leh hrai siam hran a ni dawn lo, ngaihhnathiamna a awm lo ang," a ti hmiah.

Australian Open hi nakkum January 17-30 chhung hian Melbourne Park-ah khelh a ni dawn a, tuna a lan dan chuan Grand Slam hmasa ber khel tur chuan vaccine lak ngei a ngai tih a ni leh ta, thu hi a la danglam leh thei bawk.

Tennis player zingah hripui leng invenna damdawi la lo an la tam, an zingah hian world number 1 Novak Djokovic pawh a tel. Serbian star hian Australian Open nomawi vawi kua zet a chawi tawh, mahse ani pawhin invenna a la lo a nih chuan hriatthiamna a awm lo ang.