Real-in goal an khung lo

Barcelona chak zawh loh zanah Real Madrid-in hnehna an chang thei bik lo a, an mikhual Osasuna nen 0-0 a inhnehtawkin point khatah an lungawi a ṭul.

Real hian 75% zet ball changin vawi 17 ngawt shot nei mah se goal an zawng hmu zo lo a, striker chhuanvawr Karim Benzema leh midfielder Casemiro ten hun duhawm insiam mah se an vanneih zan a ni lo - Benzema hian crossbar a tih per.

Osasuna-in target zawnah shot nei miah lo mah se goal an chhuah miau loh avangin point an hlawh chhuak a, kum 2005 hnua Santiago Bernabeu-a point an hlawhchhuah hmasak ber a ni - Kike Garcia-a'n yard nga vel lek aṭangin post a tih per a, an ui vawng vawng ang.

Real boss Carlo Ancelotti chuan, "La Liga-ah team kan intluk tawk em em a, champion tura point 100 hmuh chu har tak a nih ka ring," a ti a, ṭha fal taka champion thei an awm a rin loh thu a sawi.

Osasuna lakah chak zo lo mah se Real-in league-ah hma an hruai chhunzawm zel a, khelh zat inangah Sevilla nen point 21 ve ve an nei - nizana inkhel Real Sociedad result a zirin he thuziak i chhiar meuh chuan an dinhmun a lo danglam leh tawh ang.