Italian football a lo kir leh ta A khuh hawn nan Juve mualah Milan

Ni 94 chhung Covid-19 vanga an chawlh hnuah Italian football chu a lo kir leh dawn ta a, a khuh hawn nan zanin dar 12:30 hian Juventus khelmual Allianz Stadium-ah AC Milan chu Coppa Italia semifinal second leg khel turin an lenglut ang.

Inrinni zanah semifinal lehlam zawk khelh a ni dawn a, Napoli mualah Inter Milan an lenglut thung ang. Final chu June 17-a khelh tur niin, June 20 aṭangin Serie A an khel chhunzawm leh nghal dawn a ni.

Semifinal first leg an khelhna kha February 13 daih tawh kha a ni a, tawitein thlir kir hmasa ang. San Siro-ah mipui 72,738 an pungkhawm a, fans au ri hulh hulh karah Milan tan Ante Rebic chuan minute 61-naah goal hmahruai a khung.

Milan lam khel ṭha viau mah se defender Theo Hernandez chu minute 71-naah yellow card vawi hnihna hmuh vangin hnawhchhuah a ni, a tawp lam minute 20 chhung chu player tlem zawk ni chunga an khelh a ngai.

A tawp lamah Juve an vannei, hun tawp hma chiahin VAR hmangin penalty an hmu; forward Cristiano Ronaldo-a'n khungin an siphurh a sut. Zaninah goal lut loa an inhnehtawk a nih chuan Turin club hi away goal rule hmangin an tlang dawn.

Italian champion Juventus manager Maurizio Sarri chuan, "Player-te hi in lamah ni 60 chhung vel an awm a, chumi hnuah training kan nei leh chauh. Nidang aiin inbuatsaihna hun chu kan nei rei zawk ngei mai, training-na hmuna kan chet vel danah chuan ka lungawi.

"Boruak a danglam tawh dawn a, entu awm loa inkhelh hian nghawng chu a nei na dawn hle ang. Player ten eng tiangin nge an hmachhawn dawn chu hrethiam lo mah ila rilru zawng zawng kan pe em tih fiahna ṭha tak chu a ni ang," a ti.

Juve player zingah hian Paulo Dybala, Blaise Matuidi leh Daniele Rugani ten coronavirus an kai a, tunah chuan an dam kim tawh - zanina inkhel turin an inpeih. Sarri chuan player pawimawh Ronaldo leh Dybala chhawr kawp theih chu an ṭhatna tur a nih thu a sawi bawk.

AC Milan-in kuminah beisei an phak lo a, season kal laia nomawi an beisei theih awmchhun chu Coppa Italia hi a ni. Final lut tur chuan goal an khung ngei a ngai dawn a, striker Zlatan Ibrahimovic hliam chu an tan harsatna a ni thei.

Kum 38 mi Ibra hian May thla khan club training a zawm leh tawh a, mahse a ke dinglam a hliam - Juve lakah a inlan thei dawn lo. Ibra bakah an intawn hmasaka goal khungtu Theo Hernandez leh Castillejo te chu hliam vangin an chawl mek bawk.

Player lamgsar ṭhenkhat khel thei dawn lo mah se Milan hi chuan huhang an nei lian ve thawkhat a, hming langsar ni lem lo pawh Milan tana khel phak an nih chuan Turin khawpuiah an zam ngawt lo ang, chutihrualin an hmabak erawh a hautak dawn hle.