Italian MotoGP an ṭhulh

MotoGP Italian Grand Prix chu tun season atan neih a ni dawn lo. May 31-a inelna neih tur hi coronavirus vangin a hun sawn a ni a, rei tak chhung ngaihchan a nih hnuah hri leng vang hian neih theih a ni dawn lo.

Nilaini khan International Motorcycling Federation (FIM) chuan Italian Grand prix an ṭhulh thu hi an puang chiang a, tun hnai kum 30 chhungin Italian motorcycling Grand Prix-in inelna an thlen loh vawi khatna tur a ni ang.

Mugello Circuit CEO Paulo Poli chuan, "Intlansiak lama thuneitu leh sorkar lamin inelna neih a nih ngei theih nan kawng hrang hrangin hma an la. Mahse coronavirus vanga buaina hi a lian a, kumin atan chuan Italian Grand Prix neih theih a ni dawn lo," a ti.

Ruahman lawk dan chuan March 8 khan Qatar Grand Prix hmangin season hi ṭan tur a ni; MotoGP bakah Moto2 leh Moto3 te pawh tun thlengin an la tlan ṭan thei lo. July 19 hian a hmasa ber atan Jerez-ah inelna buatsaih an tum.

Italian Grand Prix hma hian Qatari GP, Dutch, Finnish, German, British leh Australian Grand Prix te chu ṭhulh fel a lo ni tawh. Inelna dang pawh a hun sawn leh ṭhulh theih dinhmunah an la ding mek.