Ole & United hmaa ding tur Spurs Engtin nge ni dawn?

Liverpool lakah 5-0 ngawtin Manchester United an tlawm a, sawiselna au thawm leh chil per pawh a hul hmain hna hautakin Red Devils a hmuak zui a, zanin dar 10:00-ah Tottenham Hotspur an lenchilh dawn!

Hei mai a ni lo - Thawhlehni zanah Champions League match khel turin Atalanta an lenchilh a ngai zui dawn a, Ole Gunnar Solskjae-a tan ngaihtuahna a buai map tawh ang tih a chiang.

United fans tam takin Ole hi bang tura an duh laiin an khingpui club fan-te chuan cham rih turin an duh a, anmahni fans ngei aia khingpui fans duhdana thutlukna siamtu chu United an ni.

Old Trafford lama thuneitu sangten Ole hi hun pek an la duh a, eng chen nge an pek dawn sawi erawh a awm lo - Spurs lakah a tlawm leh a nih ngat chuan dawhtheihnain a tlin reng kher lo mai thei.

Hmanlai hian maw...
United thuneitute dawhtheih chhan sawi tur chuan a phek hmasa lam keu nawn leh a ngai tlat. Kum 1986 khan Sir Alex Ferguson-a'n Manchester United a enkawl ṭan a, a season hmasa berah season laihawla enkawl chungin league-ah 11-na a nihpui!

Sir Alex hian ropuina ram thleng turin a nghak rei hle - season tluan a enkawl hmasak ber (1987-88) ah pahnihna a nihpui a, an phur dawn chauh a, 1988-89 season-ah chuan 11-na an ni leh daih.

United fans tam tak an dawhthei lo a, Alex hi bang mai turin an duh a, stadium-ah pawh Sir Alex ban duhna banner keng an tam ṭhin hle - mahse, Alex ban a ni lo a, 1989-90 (13-na), 1990-91 (6-na) leh 1991-92 (2-na) ah pawh nomawi a la chawi chuang lo!

Mahse, 1992-93 season a thlen meuh chuan Sir Alex-a'n Premier League nomawi a chawi a, amah sawiseltuten an fak thar a, United a chhuahsan meuh chuan Red Devils nomawi hunnaah uanpui tham nomawi a hnutchhiah.

Tichuan...
Kum 2013-ah Sir Alex-a'n club enkawl reng chu a tlin tawh loa inhriain coach hna a chawlhsan thu a puang a, a aiawh tura an lak chu David Moyes a ni - hming lemah 'The Chosen One' tih an pe a, fans an phur takzet.

Mahse, Everton tana ṭha taka hna thawktu coach hian club lian enkawl meuh chu a lo zo lo a ni mai thei. Kum khat pawh a tlin hmain a hna aṭangin an chawlhtir a, Louis van Gaal, Jose Mourinho leh Solskjaer te an chhawr leh tawh!

LVG leh Mourinho pawh hun rei pek an ni lo a, an beisei ang result an hmuh loh avangin chhuahna lam kawng an kawk rang hle. Hei tak hi Red Devils thuneitute chuan an tihsualah an ngai a, Ole a vanneih phah ta.

United thuneitute chuan Sir Alex ang khan Ole hi hun pek an duh a, team a din chhoh mek avangin nghah hret an pawi ti lo - fans lam tan erawh dawhtheih a har tawh hle ang.

A na asin!
United fans tan chuan hmelma kumhlun Liverpool lakah ber kher 5-0 a tlawm kha a na a, player-a nih laia a sulhnu theihnghilh ṭhaka Ole ban duhtu an awm nual hi dem ngawt theih pawh an ni chuang lo.

Hei chauh a ni lo. Player senior ṭhenkhat chuan club thuneitute hnenah Ole an thlawp thu an hrilh a, an result-ah chuan an thiam loh pawh tam tak a awm ve tho thu an sawi niin khawthlang media-te chuan an tarlang.

Mahse, hetiang boruak karah hian United thuneitu ṭhenkhat chu silai hmet per turin an inkau reng tho a, Spurs lakah an chak lo a nih ngat chuan Leicester City boss Brendan Rodgers be nghal turin an inpeih nia sawi a ni leh tawh!

United hi Italian coach ṭha Antonio Conte nen sawizawm langsar ber an ni a, mahse, tun hnaiah United hian Rodgers hi Red Devils kaihruai turin an duh thar nia sawi a ni.

A buai zo
Khawthlang media titi chu khawhar ina nu ho titi ang chauh a ni a, rin tur ber leh awih tur ber hriat a har - chiang taka lang erawh United thuneitu lam pawh an inthurual bik lo tih hi a ni.

A ṭhenin Ole nghah an duh a, a ṭhenin ban an duh tawh - a ban duh lam an chak lo a, Spurs laka an result a ṭhat loh hlauha Ole 'kawk' turin an lo inpeih ve ran tlat.

Hei vang tak hian Ole tan zanin inkhel a pawimawh lehzual a, Norwegian coach hian a chak loh vangin a hna la chân rih lo pawh ni se Spurs zawhah Atalanta leh Manchester City a tum zui dawn a, insiamṭhat a har tawh dawn.

A tawi zawnga sawi chuan Ole-a'n a hna chân lo turin chak a mamawh a, tuna a insiamṭhat loh chuan insiamṭha turin hunin a daih tawh kher lo ang.

Pianthar mamawh!
United-in siamtharna mai ni loin pianthar an mamawh a, Spurs laka chak tur chuan a bik takin tlarhnung lamin insiamṭhat an mamawh takzet - Liverpool laka an khelh dan en ila, Reds tlarhmaten an duh hun hunah an ṭhiat emaw tih mai tur a ni.

Red Devils hian inelna hrang hranga an match hnuhnung 20-ah goal chhuah loh vawi khat chiah an nei a, hetih chhung hian goal 34 an chhuah - tlarhma lamin goal khung reng pawh ni se chak zel tur chuan khung hnem a ngai!

United tana lawmna turin Raphael Varane-a'n training a zawm leh tawh a, insiamṭhat mamawh Harry Maguire leh Victor Lindelöf te chu duhthlan tur dang an neih an ni.

Tlarhmaah Cristiano Ronaldo-a'n sawisel a hlawh ṭan mek a, Ole-a'n a chawlhtir ngam ang em, tih chu zawhna awm mek a ni. Liverpool laka red card hmu Paul Pogba a chhawr theih dawn loh bawk.

Spurs lam hi
United lakah Spurs an inchhuang thei bik lo - league match kua khelh tawhah vawi nga chiah an la chak a, vawi li an tlawm tawh. Table-ah parukna an ni mek a, an hnuai chiaha awm United aiin point khatin an sang.

Thla hmasa khan Spurs hi league-ah Crystal Palace (3-0), Chelsea (3-0) leh Arsenal (3-1) ngam loin a zawnin an tlawm a, Aston Villa (2-1) leh Newcastle United (3-2) hneh ve leh mah se West Ham (1-0) lakah an tlawm leh tawh.

Team talbuai pahnih zaninah an intawng dawn a, a chak zawk tan hma hun êng takin a thlir ngam ang. Spurs hian United zawhah Europa Conference League khelin Vitesse an mikhual dawn a, Ole ai chuan Nuno Espírito Santo-a tan ngaihtuah tur a tam lo zawk.

Spurs tan Harry Kane-a'n a theihna tak tak a pholan chuan United tlarhnung tan buaipui tham a tling ang tih a chiang a, Son Heung-min hi Maguire leh a ṭhiante tan pawh buaipuitham tling tur a ni.