Thih leh Dam : India vs New Zealand

Pathianni zan dar 7:30 hian Dubai International Stadium-ah India leh New Zealand te an inkhel dawn a, cricket ram ṭha pahniha chak lo zawk tan T20 World Cup semifinal luh a harsat tawh dawn avangin 'quarterfinal' ang hiala chhal theih a ni.

Men in Blue leh Black Caps te hian an match hmasa berah Pakistan an hneh lo ve ve a, group khat aṭanga pahnih chauh tlang tur a nih avangin Dubai-a inkhel tur hi a pawimawh hle.

Thil awm dan
Pakistan-in Super 12-a team ṭha pahnih India leh New Zealand an hneh ringawt lo a, Virat Kohli hote phei chu an sawp. Shaheens hian nizan khan Afghanistan an hmachhawn a, an hmabakah Namibia leh Scotland te chauh an awm tawh avangin chak ngei tura ngaih an ni.

Chumi awmzia chu, Babar Azman-a captain-na hnuaia khel team hi group 2 aṭanga tling ngei tura ngaih an ni tawh. India leh New Zealand te pawh hian Afghanistan, Namibia leh Scotland te an la hmachhawn lo a, chak ve ve tura ngaih ve ve an ni.

Chutiang a nih takah chuan Pathiannia Men in Blue leh Black Caps inkhel tur hian semifinal lut tur a hril thei dawn a, inkhel pawimawh bik a nih avangin ngaihven pawh a hlawh hle.

Chona thar
India-in player ṭha an ngah a, uar taka sawi chuan squad-a thlan loh zingah pawh champion pui tham player an awm tih theih khawpin an ṭha. New Zealand nena an inkhelh tura pawh hian player 11 thlan turah pawh inhnialna a tam hle.

Match hmasa berah Pakistan lakah an mualpho avangin India-in player an thlak kual ve ngei a rinawm a, India cricket legend Sunil Gavaskar chuan Hardik Pandya leh Bhuvneshwar Kumar te aiah Ishan Kishan leh Shardul Thakur te lut zawk turin a duh.

Shaheens an hneh loh ṭum hian bowler Mohammed Shami-a'n sawisel a hlawh bawk a, social media lamah phei chuan Shami hi India ram chhuahsana Pakistan lama pem turin an ti el hial.

Shami hian over 3.5 vawmin 43 runs a pe a, a khel ṭha lo tih hriat mah se India tana a hnathawh tawh thlirin hetianga auh el tur hi chu a ni lo. Kum 31 mi Shami hian a theihna hmangin amah ti el tute rawn chhan let a tum ang. Chutihrualin Shami aiah tawnhriat nei ṭha Ravichandran Ashwin a lut thei bawk a, Virat Kohli tan thutlukna harsa siam a ṭul dawn.

Black Caps hi
New Zealand hian ODI World Cup hnuhnung berah India hi semifinal-ah an hneh a, captain Kane Williamson-a hnuaia khel an nih avangin Men in Blue hnuaia dah an rem lo.

Chutihrualin Black Caps hian World Cup hmain Pakistan-a an zin tur an ṭhulh avangin inpuahchahna ṭha an nei lo. Warm up match ṭum hnih an khelhah Australia leh England te an hneh lo a, Pakistan hneh loa bul an ṭan avangin T20 match hnuhnung pathumah an chak lo vek.

New Zealand hian inhliam vangin tun ṭum World Cup-ah hian an bowler ṭha Lockie Ferguson an chhawr thei lo a, an ṭhat dan berin Dubai an pan lo. Chutichung chuan Black Caps hian Martin Guptill, Kane Williamson, James Neesham, Trent Boult leh Tim Southee te an kawl a, champion thei tur zinga mi an ni.