Foxes mualah Arsenal lut dawn

Premier League 2015-16 season-ah khan Leicester City an champion a, pahnihna chu Arsenal an ni - team pahnih inthlauhna hi point 10 lai a ni. A hnu lamah season rukna an hmang leh mek; champion tura rinkai ni lo mah se chungnung zawk nih tuma inel tawk tak an ni.

Tun dinhmunah Gunners leh Foxes hian league match kua aṭangin point 14 ve ve an hmu a, an intiat tawk hle. Vawiin tlai dar 5:00 hian King Power Stadium-ah an intawng dawn, inkhel a zawh hnua chungnung zawk nih an tum ang.

Tun hnai season hnih chhung chu Leicester City hnuaiah Arsenal hian kum tawp an hmang, an record ṭha lo tak thaibo tur chuan team pahnih intawn ṭuma chak zawk nih hi a pawimawh dawn hle.

Ven ngai Vardy
Player ṭhenkhat chuan club ngam bik an nei a, goal khung theihna leh harsatna an nei ve fo. Jamie Vardy tan chuan Arsenal hi goal khung nawmna club a ni. Gunners lakah league match riat inkhel bul a ṭanah goal riat lai a khung.

English striker hi kum 34 mi ni tawh mah se a la hriam ṭha viau, season kal laiah pawh league goal sarih a khung leh der tawh - ani aia khung hnem chu Liverpool forward Mohamed Salah (10 goals) chiah a ni.

Arsenal tlarhnung tan Vardy hi ven ngun ngai bik tur a ni dawn, ani bakah hian amah thlawp turin Kelechi Iheanacho emaw Parson Daka emaw an luh a rinawm a, anmahni mual a nih dawn avangin Mikel Arteta naute tan tlarhnung rem uluk a ngai hle ang.

Tlarhnung buai?
Leicester hmatawng hlauhawmzia kan hria, a hmachhawn tur Arsenal hi an tlarhnung an buai ru mek. Arteta-a'n tlarhnung khawng tak a rem khawm tawh a, mahse tun hnaiah Ben White leh Kieran Tierney te an hliam a, anni hi 100% a dam an la ni lo.

Arteta chuan, "White chu a la training lo, Kieran erawhin training a nei ṭha viau a, amahereawhchu 100% a la ni lo. Match khelh dawn hnaiah a dinhmun kan ngaichang leh ang," tiin a sawi a, a defender pawimawh hi a ṭul a nih chuan a chhawr theih dawn niin a lang.

League Cup an khelh ṭumin White-a hi a inhliam a, a dam hman ve ta lo. Captain Pierre-Emerick Aubameyang erawh hahchawlhna hun pek a ni a, league lamah mawhphurhna sang zawk nen a lo kir ang - Bukayo Saka leh Emile Smith Rowe te nen an inthlawp leh dawn a ni.