Covid-19 vangin Alli an hrem

Tottenham midfielder Dele Alli chu social media lamah  fiamthu thawh nan Covid-19 a hman avangin hrem a ni. Football Association chuan Alli hi match khat khel thei lo turin an ti a, June 19-a Manchester United an hmachhawn hunah a inlan thei lo ang.

February thla khan Alli hian social media lamah coronavirus chu fiamthu thawh nan a hmang a, Asian mi pakhat chu a nuih sawh bawk. A thil tih vang hian £50,000 (Rs nuai 48) chawitir a nih bakah, hri leng chungchang zirtirna nei tura thupek a ni bawk.

Nimin tlai thleng khan khawvel pumah coronavirus vang hian mi 416,000 chuang an thi tawh; Spurs midfielder hian a thil tihsual vang hian a hnu lawkah ngaihdam dil nghal mah se hremna a pumpelh phah chuang lo.