Tsitsipas hnehtu Frances Tiafoe

Vienna Open-ah champion tura rinkai leh seeded pakhatna ni bawk Stefanos Tsitsipas chu last 16-ah a tla. Greek tlangval hi Frances Tiafoe nen an inkhel tawk hle, a tawpah American player zawkin 3-6, 6-3, 6-4 a hnehna changin quarterfinal a lut.

Set khat ve ve an lak hnuah chak zawk tur chinfel a ngai, set hnuhnung berah Tiafoe hi 0-3 in a hniam hman. Mahse, game hnuhnung pasarih zinga paruk ngawt lain rin loh zawkin hnehna an chang.

Player pahnih hi June thla khan Wimbledon-ah pawh an lo intawng tawh, an inkhelh hnuhnung zawkah pawh hian Tiafoe-a'n hnehna a chang. A match lehpekah chuan seeded pariatna Diego Schwartzman nen an inhmachhawn leh dawn a ni.

Inkhel dangah Alex-ander Zverev chuan Alex de Minaur chu 6-2, 3-6, 6-2 a hnehin quarterfinal a lut, German star Zverev hian tennis a khelh hun chhungin match 300 a chak tling ta chiah a, mellung pawimawh a phun.

Kum 24 mi Zverev chuan, "Ka tan chuan final ni lo mah se inkhel pawimawh bik a ni, hnehna ka chang thei hi ka lawm takzet. A bul kan ṭan lai ngaihtuah chuan match 300 chak hi thil ropui a ni," tiin a sawi.