Man City tan thawhlehna hun

Pep Guardiola enkawl Manchester City chu League Cup aṭanga pet tlak an ni a, an nomawi kawl lai an hloh. An chak loh hnuah City hmachhawn leh hi club tam takin an chak loh a ni ṭhin - zanin dar 7:30 hian Etihad Stadium-ah Crystal Palace an lo mikhual ang.

Man City hian tun hnaiah a zawnin League Cup vawi li an chawi a, Spanish manager Pep-a hnuaiah he inelna bikah chuan West Ham chiah hi ngam loh an nei; an chak lo thinrim hi Palace lakah inhrik thlak an tum dawn a ni.

Pep-a'n a player a la siksawi reng a, tun dinhmunah hliam leh harsatna nei langsar an awm lem lo. An ṭhat dan takin Palace an mikhual thei dawn, kar laihawla inkhel player naupang zawkte tan Premier League-ah chuan hmun a awm leh tawh rih lo ang.

City hi tun season Premier League match hmasa berah khan Tottenham lakah an chak lo, a hnu lamah erawh tlawm an nei tawh lo - vawi ruk chakin ṭum hnih dang chu an khingpuite nen an inhnehtawk.

Etihad Stadium bikah league goal an la chhuah miah lo, keeper ṭha Ederson bakah defender rinrawl Ruben Dias, Aymeric Laporte leh Joao Cancelo te an awm avangin zaninah pawh harsa lutuk loin an chak a rinawm.