Chak mamawh India inlan dawn

AFC Under-23 Asian Cup 2022 qualification a an match hnuhnung berah India chu zanin dar 10:00-ah an inlan dawn a, an hmachhawn tur hi Kyrgyz Republic an nih avangin India tan chak a beisei ngam.

Blue Tigers hian an match hmasa berah Oman chu 2-1 in an hneh a, an match hnihnaah qualifier thlengtu United Arab Emirates chu hun tawp dawna penalty vangin 1-0 in an ngam lo thung.

UAE laka an tlawm avangin India-in an match tawp berah chak ngei ngei an mamawh a, an chak a nih pawhin UAE result-ah an la innghat tel dawn cheu.

Group E-ah India hi UAE, Oman leh Kyrgyzstan te nen an awm ho a, vawi khat ṭheuh an chak tawh avangin point thum ṭheuh an nei - group hmahruaitu chauh chu Asian Cup U23 khel tura tling tur an ni.

UAE-in India an hneh avangin Blue Tigers lakah head-to-head result an nei ṭha zawk a, point inangah an intum tawhna hi en tur a nih avangin India hi chak pawh ni se UAE-in Oman an hneh chuan UAE hi an tlang dawn.

Chutihrual chuan UAE hi tlawm ta se, India chak se, Oman leh India-in point ruk ve ve an nei ang a, Blue Tigers-in Oman an lo hneh tawh avangin India chu tlang tur an ni thung.

India leh UAE hi chak ve ve ta se, tlang ve ve dan pawh a la awm tho - pahnihna ti ṭha paliin group 11-a pakhatna ṭheuhte hnung hi an zui dawn a, India an chak chuan pahnihna ti ṭha pali zinga tel chance a la sang hle.

Nakkuma neih tur, kum 23 hnuai lam inelna Asian Cup-a tel tur zawnnaah hian Lalengmawia chu Mizo awmchhun a ni a, Vaivakawn tlangval hi bul ṭan tura beisei a ni - Indian football team facebook page-ah inkhel hi live-a en theih turin pekchhuah a ni ang.