Keita a dam, Fabinho & Thiago an chawl

Liverpool boss Jurgen Klopp chuan Manchester United an sawp ṭuma inhliam Naby Keita-a'n ngai a awh leh tawh thu a sawi a, German coach chuan, "Mak kan ti zawk a, a vannei takzet a ni. Zanina inkhel turin a inpeih tawh," a ti.

Reds hian zanin dar 7:30-ah league match khel turin Brighton & Hove Albion an mikhual dawn a, Keita inlan thei dawn mah se Fabinho leh Thiago dinhmun erawh a ṭha lo.

Klopp chuan, "Fabinho dinhmun chiang taka hrilh ka la ni rih lo a, ka nghak mek - a inlan loh ka ring zawk. Tun thlengin club training a la zawm lo a, kan tan chuan chanchin lawmawm a ni lo," a ti.

Liverpool boss chuan Thiago Alcantara chungchang sawi zuiin, "Thiago-a'n pangngai takin training session a nei tawh a, mahse, vanduaithlak takin a inkhel thei tawh dawn tihna erawh a ni lo," a ti a, kum 30 mi midfielder hian tun season-ah match nga chiah a la khel.

Reds hian league match kua khelh tawhah tlawm an la nei lo a, heti chung hian hmahruaitu Chelsea chu khelh zat inangah point khatin an phak lo mek. Nilaini zan dar 1:30-ah Champions League match khel turin Atletico Madrid an mikhual zui dawn a, match thum an khelh tawhah an la chak vek.