Australia-in Sri Lanka an sawp

ICC T20 World Cup khelh mekah Australia chuan Ningani zan khan Sri Lanka chu wicket sarihin an hneh. Aussies hi match hnih khelhah an chak ve ve a, zanin dar 7:30 hian anmahni ang bawka 100% chak record la nei England nen an inhmachhawn ang.

Dubai International Stadium-ah ṭhumvawra chak Australia-in bat hmasak vawm hmasak an thlang. Sri Lanka tan Kusal Perera (35), Charith Asalanka (35) leh Bhanuka Rajapaksa (33*) te an che ṭha a, 154/6 runs an siam. Aussies tan chetsual theihna ni mah se opener pahnih David Warner (65) leh captain Aaron Finch (37) te an che ṭha a, over 17 lekah 155/3 runs siamin hnehna an chang.

Sri Lanka captain Dasun Shanaka chuan, "Kan bul ṭan ṭhatna kan hmang ṭangkai lo a, batter insiamrem tawh kha chuan over 16-na te min thlenpui thei se kan dihmun a ṭha thei ang. Kan khelh leh turah chuan kan insiamṭhat ngei a ṭul," tiin a sawi a, Australian batsman te a fak bawk.

Australia captain Finch chuan, "Bowling lamah Zampa leh Starc te an che ṭha a, a hun taka wicket kan lak zarah harsatna kan tawk lo. Warner pawh a khel ṭha a, tunah chuan England nena kan inkhelh tur atan rilru kan pek a ṭul a ni," tiin a sawi.

T20 World Cup-ah hian group khat aṭangin pahnih chauhin semifinal an lut dawn a, England leh Australia inkhela chak zawk hian semifinal an luh ngei a rinawm. Three Lions hian West Indies leh Bangladesh lakah harsatna nei loin hnehna an chang tawh a, Aussies lakah fiahna tak tak an hmachhawn ang.