A chung berah Napoli

Serie A season kal laiah Napoli an kaltluang viau, an match hmasaah point hloh ve zeuh mah se tunah chuan an chak leh ta. Ningani zan khan Luciano Spalletti naute hian an mikhual Bologna chu 3-0 in an hneh.

Napoli hian league match 10 an khelh tawh aṭangin point 28 an hmu a, table chung berah an awm. AS Roma nen an inhnehtawk tih mai loh chu an la chak fai vek, pahnihna AC Milan nen an point hmuh a inzat avang erawh chuan inchhuang thei an la ni bik lo.

Bologna lakah hian captain Lorenzo Insigne-a'n goal hnih a khung a, ani bakah hian Fabian Ruiz chuan goal khat a khung bawk - Spalletti nauten an tlarhnung an venghim ṭha zui a, season kal laiah goal thum chiah an la chhuah.

Italy international Insigne chuan, "Ka contract chungchangah zawhna ka dawng hnem, kei chuan nuam ti taka inkhelh bak hi ka ngaihtuah lem lo," tiin a sawi, tun season-ah league goal li a khung tling ta chiah.

Insigne-a contract neih lai hi tun season tawp rualin a tawp dawn a, tunah hian inbiakna a kal mek. Contract thar a ziak lo a nih chuan season tharah man nei loin a duh lam a hawi thei dawn tihna a ni.

Napoli hian Pathianni zanah league match an khel zui leh nghal dawn, dar 10:30 hian kai thar Salernitana an lenchilh leh ang - karleh lamah Europa League khelh tur an neih bawk avangin player indahṭhat a ngaih a rinawm.