Bayern-in DFB Pokal final an lut

German football thuntu Bayern Munich-in DFB Pokal final an lut a, thilmak niin a lang lo. Amaherawhchu Nilaini zan inkhelah hian Bavarians-in VAR puihna nen Eintracht Frankfurt 2-1 in an hneh hram. 

German Cup final hi July 4, Inrinniah khelh tur a ni a, Hansi Flick-a hote hian Saarbrucken hnehtu Bayer Leverkusen an hmachhawn ang.

2018 DFB-Pokal final rematch-ah Bayern tan Ivan Perisic-a’n minute 14-na lekah goal hmahruai a khung a, Frankfurt-in Danny da Costa hmangin minute 69-naah a sut. Bavarians an hlauthawng hman a, Robert Lewandowski-a’n minute 74-naah chakna goal a khung. Hansi Flick-a hote treble champion thei dinhmunah an ding zel.

Allianz Arena-a inkhelah hian Bayern Munich hi chak tura rinkai an ni a, Hansi Flick-a’n team ṭha zawk an ni tih hre chungin sa huai a ser a, chetsual a tum lo.

Captain Manuel Neuer-a’n tlarhnung hoin David Alaba leh Jerome Boateng te defence laiah inkawpin Alphonso Davies leh Benjamin Pavard te mual sirah dah an ni.

Joshua Kimmich leh Leon Goretzka ten midfield an luah lum a, tlarhmaa maltlat Robert Lewandowski thlawp turin Thomas Muller, Ivan Perisic leh Kingsley Coman te awmin kil tinah player ṭha an awm.

Bayern Munich-in inkhel an thunun nghal a, chance ṭha pawh an ngah nghal. Minute 14-naah Kingsley Coman-a’n mual lai aṭangin a vawrh lut. Lewandowski-a’n la thla fuh tawk lo mah se a per chu Thomas Muller-a’n fing takin a pet nghal a, Perisic-a’n a tauh lut.

Germany national team coach Joachim Low-a’n ram tana koh a tum tawh loh Muller-a’n a class zia a pholang zel. Bundesliga-ah pawh record siamin Muller hian assist vawi 20 a nei. Flick-a hnuaiah Bavarians an che ṭha a, Muller ṭangkaizia hmufiahtuten Low-a’n a thutlukna a sut an ring hial tawh.

Mual sir kil hnih aṭangin Bayern-in an nawr a, wing back hmuhnawm Alphonso Davies-a’n a tlan chakna hmangin Frankfurt tlarhnung a tal put. Bayern wing back cross ṭha zet chu Frankfurt keeper Kevin Trapp-a’n khawih fuh lo chiahin goal ruakah Coman-a’n a khung lo.

Lewandowski thiamzia hmuh tur a awm zui. Polish striker hian mawi lutukin a petna tur khawp insiamin goal-ah a pet a, Kevin Trapp-a’n a dansak. Halftime-ah 1-0 chauh a nih avangin Frankfurt-in beisei an la nei.

Bayern-in inkhel an thunun avangin final kawng harsa turin lang lo mah se minute 69-naah Danny da Costa hmangin Frankfurt-in siphurh an sut a, inkhel kalhmang a dang daih. Japanese midfielder Daichi Kamada-a’n bench aṭanga a luh hnu lawkah goal-ah a pet a, hemi per hi Da Costa hian nang fuhin kawh zetin a pet goal.

Bavarians vanduai thei dinhmunah ding a, hun harsaah Robert Lewandowski a rawn lang. Goretzka-a’n fing takin box chhungah a pet lut a, Davies-a’n vawi khatah cross nghalin player fing Kimmich-a’n Lewy tan siamsakin Polish striker-in goal-ah a chantir.

Assistant referee-in flag a phar hman avangin offside-ah an ngai a, mahse VAR hmangin an ennawn a, Davies-a’n dan a bawhchhe lo - Bayern goal pawmsak niin goal dang a lut tawh lo.

Bayern Munich coach Hansi Flick chuan, “A pawimawh ber chu final thlen a ni a, a chak zawka kan ṭan avangin a lawmawm. Chance ṭha hlah lo ila awlsam zawka chak thei tur a kan ni a, chuti chung chuan second half-a kan khelh danah pawh ka naute chungah ka lawm,” tiin an khelh danah a lungawi thu a sawi.

Bavarians hian final thlen tak avangin German Cup-a champion turin vawi khat chak chiah a ngai tawh a, Bundesliga nomawi chawi turin vawi hnih chak chiah a ngai tawh bawk.