Atletico an chelh; La Liga a ngaihnawm tulh tulh
Barcelona-in tlakchhiat lam an pan mek a, an buaina ata talchhuah tumin coach Ronald Koeman hial an ban - hetiang boruak karah hian an elpuiten eng ruai an ang thei bik lo.
Atletico Madrid chuan Ninganni zan khan Levante chu 2-2 in an inhnehtawkpui a, league match hnih chhung chu a zawnin draw result an nei ta - table-ah parukna an ni!
Levante muala inkhelah Atletico tan Antoine Griezmann leh Matheus Cunha ten hmahruaina goal vawi hnih ngawt khung mah se Enis Bardhi chuan penalty hmangin a sut ve ve a, a tawpah point an insem.
Ningani zan inkhel ngaihven hlawh dangah Real Sociedad chuan 2-0 in Celta Vigo an hneh a, league table chung ber an luah chhunzawm zel - La Liga a ngaihnawm tulh tulh.
Beisei loh
Atletico-in Sociedad an inhneh-tawkpui tawh a, Levante mualah chuan chak tawh tura beisei an ni - minute 12-na lekah he beiseina hi Griezmann chuan a chhem nung nghal a, hnai set sawt aṭangin a tauh lut.
Mahse, khualmuala Atletico hlim chhung a rei lo. Luis Suarez-a'n an penalty area aṭanga ball khalh chhuah a tumna lamah Levante defender Ruben Vezo nen an in nangching a, sawisel theih tak turin referee-in penalty a chawitir.
Thla hnih zet hliam vanga inkhel tawh lo Enis Bardhi chuan harsatna nei loin penalty hi goal-ah a chantir a, mualneitu au thawm a ring. Mahse, Atletico an ngawi reng bik lo - minute 76-naah Cunha chuan ṭha zetin a pet goal leh a, 2-1 a ni.
Atletico hlim chhung erawh a rei lo ṭhin hle. Renan Lodi chuan a kutin ball a tawk fuh niin a lang a, referee-in VAR a rawn hnuah penalty spot a kawk - kum 26 mi Bardhi chuan goal-ah a chantir leh sak a, hun tawp thlenga goal dang lut loin 2-2 in an ṭin.
Hahdam rawh Simeone!
Atletico ṭantu tan chuan referee thutluknaah lungawi a harsa a, penalty pahnih chu pek loh theih ve ve niin a lang - Atletico coach Diego Simeone a lungawi lo fal a, hnawhchhuah a ngai hial.
Simeone chuan,"A nihna takah chuan hmasawn kan mamawh a, a rang thei ang bera kan insiamṭhat a ṭul a ni," tiin a sawi a, Argentine coach hian penalty ngawt chu an chak zawh loh chhanah a ngai chuang lo.
Levante defender Rober Pier pawh red card pek a ni a, mahse, a yellow card pahnihna pek a nih hian hamrik tawp ber ham a ni tawh a, Atletico tan chhawr tur a awm tawh lo - an hneh zawh loh Levante hi table-ah 19-na an ni a, chak an la nei lo!
October 7-a coach thar atana an lak Javier Pereira hoin insiamṭhat hna an thawk mek a, Atletico chelh theih hi an tan chuan result ṭha a ni. Atletico hian Pathianni zan dar 8:45-ah league match an khelh chhunzawm dawn a, Real Betis an mikhual ang - an league nomawi humhim an duh chuan point hloh a thiang tawh lo.
Sociedad an kal zel
Real Sociedad-in season duhawm an hman chu an chhunzawm zel a, khualmualah Celta Vigo chu 2-0 in an hneh - goal khung tur erawhin second half an nghah thlen a ngai thung.
Mikhual team tan Alexander Isak chuan minute 54-naah goal hmahruai a khung a, mualneitu lamin a chhanletna tur an neih hmain Aritz Elustondo chuan minute 79-naah a belhchhah ve leh bawk.
Celta-in mahni mualah mikhual an ngam lo a, goal an khung theih loh avangin an tlawm - Sociedad erawh La Liga table chung ber luahtu an ni zel a, an hnuai chiaha awm Real Madrid aia match khata khel tamin point thumin an sang zawk.
Real Sociedad hian season tira an match hmasa berah Barcelona chu 4-2 in an ngam lo a, hemi hnuah erawh league-ah tlawm an nei tawh lo. Pathianni zan dar 1:30-ah Athletic Bilbao an mikhual zui ang.