Real manager Zidane a bang

Zinedine Zidane-a'n a inkhelh hun laiin goal ropui bik hmangin Real Madrid a champion pui a, manager a nih hnuah pawh Los Blancos hi kum hnih leh a chanve chhungin vawi thum nomawi a chawi pui. Khawvelin Zidane-a ropui zia an sawi mek laiin French manager chuan European champion an nih aṭanga ni nga hnu lekah a ban thu a puang.

Nimin tlai khan Zidane chuan thutharthehdarhtute kawmin Real Madrid manager hna a kalsan thu hi a tichiang a, player a nih laiin sawi lawkna awm loin inkhelh chawlhsan thu apuang tawh a, manager a nih hnua a thulukna pawh hian president Florentino Perez bakah khawvel a barakhaih hle.

Real hmangaih vangin?
French manager Zidane hian Bob Paisley leh Carlo Ancelotti te huanga awm turin Liverpool hnehin Champions League nomawi a vawi thum nan a chawi pui a, manager ropui pahnihna te aia a ropuina chu ani chuan kum zawnin a champion. Nomawi vang hian season laihawl vela dinhmun derthawng Zidane hi Los Blancos manager a nih chhunzawm zel a rinawm a, thil thlen dan erawh a dang.

Zidane chuan, "Ka tan, squad tan leh club tan pawh mak a ang reng a, amaherawhchu kan vai tana thutlukna ṭha tur a ni. Real Madrid hi ka hmangaih a, an chak zel theih nan inthlak danglam a ṭul. Hruaitu dang an mamawh nia ka hriat avangin thutlukna ka siam," tiin club a hmangaih vanga ban a nih thu a sawi.

Real president Florentino Perez chuan, "Kan beisei loh lam thutlukna a ni a, kei leh club tan ni lungchhiatthlak tak a ni. Thutlukna a siam tawh thu min hrilh khan hmin let ka tum a, amaherawhchu kan hmangaihna leh kan thlawpna a dawng ṭha tih hre chunga thutlukna siam a nih avangin a harsa a tawh. An ina manager ni tura ka sawm ṭum ka hre chhuak a, ka ringtawk hle. Tunah erawh a thutlukna kan pawm a ngai a, engtik niah emaw chuan a rawn let leh ang," tiin Zidane a ui thu leh thutlukna an zah sak thu a sawi.

A chawl rih dawn
Zidane chuan, "Kum thum chhung Real Madrid ka enkawl a, coaching hna hi hrehawm tihna ka nei lo. Amaherawhchu tunah chuan club chhungah tih danglam ngai a awm avangin ka chawlh rih a ngai a ni. Tun dinhmunah club dang ka melh dawn lo a, team ka enkawl rih dawn lo," tiin a chawlh rih tur thu a sawi.

French manager ban chhanah hian Cristiano Ronaldo nena an inkar ṭhat loh vang tih thawm te a awm a, team chhung boruak ṭhat tawk loh vanga ngaite awm bawk mah se Zidane erawhin a pha thung.

Champions League-a vawi thum Real Madrid champion puitu chuan, "Thutlukna ka siamna chhanah hian player-te an inrawlh lo. A ngai renga kal hi a har a, vawi thum Champions League nomawi chawi hnua chawi leh hi a harsa dawn. Champion duh mi ka ni a, chak loh hi ka duh lo a. Ka champion nawn dawn loa inhriatna ka nei a, nomawi ka chawi loh chuan ka bang dawn tho a inhriatna ka neih avangin thutlukna hi ka siam," tiin mimal thutlukna a nih thu a sawi.

Player leh manager anga football khawvela ropui ber zinga mi Zidane hian a thutlukna a siam tawh avangin thutlukna a sut tawh loh tur thu a sawi a, chutihrualin club president Perez thu chhuak aṭangin engtik niah emaw chuan Los Blancos manager ni tura a rawn let leh a rinawm thung.

Tu nge thlak dawn?
Real Madrid manager hna a ruak a, thawm a ring nghal. Khawvel manager ropui Sir Alex Ferguson, Jose Mourinho leh Pep Guardiola ten Champions League nomawi vawi hnih chauh an chawi theih laia vawi thum chawi tawhtu Zidane-a thlak thei tur khawpa ṭha erawh an vang dawn.

Los Blancos manager tur hian Tottenham manager Mauricio Pochettino hming chu a ri ring nghal a, Juventus manager Massimiliano Allegri bakah Chelsea nena sawi zawm Napoli coach hna kalsan Maurizio Sarri leh Arsenal manager hlui Arsene Wenger te hming a lang bawk.

Real Madrid president hlui Ramon Calderon chuan president ni lai Perez-a'n thutlukna a siam hmain dressing room-a thuneihna nei pha Cristiano Ronaldo, Sergio Ramos leh Marcelo te a rawn a rin thu a sawi ve bawk.