French Open-ah Djokovic-a'n third round lut

French Open khelh mekah Novak Djokovic chuan Jaume Munar hnehin third round a lut a, Nilaini zan inkhel dangah Alexander Zverev leh Grigor Dimitrov te chuan set nga an khelh hnuah an khingpui ve ve an hneh hram bawk.

Roland Garros, Paris-a inkhelah Djokovic hian world number 155 lakah 7-6 (7-1), 6-4, 6-4 in hnehna a chang, set hmasa berah hian 5-2 ngawtin hma hruai fal mah se tie break an khelh a ngai leh hial a, set hnuhnung pahnihah erawh buaina a tawk lo.

Kum 31 mi Djokovic chuan, "Hliam vangin court chhungah harsatna ka nei tih chu phat tur a awm lo, chutihrualin mihring nuna harsatna dang thleng ṭhin nen chuan tehkhin tham pawh a ni lo ang. Infiammi tan chuan chona hmachhawn hi chu kan tih tur leh hmabak ve reng chu a ni," tiin a sawi.

Grand Slam vawi 12 champion tawh Djokovic hi tun ṭumah hian seeded 20-na a ni phak chauh a, zanin hian seeded 13-na Bautista Agut nen an inkhel leh ang. Agut hian Santiago Giraldo chu 6-4, 7-5, 6-3 in a lo hneh ve bawk a ni.

Zverev tan faihna
World number 3 Alexander Zverev-a'n a match hnihnaah fiahna hautak a hmachhawn nghal. German rawlthar beiseiawm hian world number 60 Dusan Lajovic chu 2-6, 7-5, 4-6, 6-1, 6-2 in a hneh hram. Zaninah Damir Dzumhur nen an inkhel zui leh ang.

Kum 19 mi Zverev hian Grand Slam nomawi a la chawi ngai lo a, fourth round pawh a la pel ngai lo a ni. Mahse, tun hnaia player chhuak thar zinga theihna nei sang berte zinga mi a ni, French Open hma hian Munich leh Madrid Open nomawi a chawi thei.

Inkhel dangah seeded palina Dimitrov chuan 6-7 (2-7), 6-4, 4-6, 6-4, 10-8 in Jared Donaldson a hneh ve bawk. Player pahnih an inkhel tawk a, an inkhelh hun chhung hi darkar li leh minute 19 zet niin, an point vuak chhuah zat hi 346 a ni.

Japan tlangval Kei Nishikori pawhin Benoit Paire hneh turin set nga tho a mamawh. Nikum Wimbledon hnua a Grand Slam hmasa ber kheltu Nishikori hian 6-3, 2-6, 4-6, 6-2, 6-3 in hnehna a chang. Season hmasa US Open-ah khan anni pahnih hian set nga an lo khel tawh bawk a, US leilunga chak lo zawk Nishikori-a'n anmahni mualah ngei Paire a hneh let.