India basketball team-ah Lalrina Renthlei

Mizoram Basketball Association (MBBA) chuan May 30 khan Basketball Federation of India (BFI) secretary general, Chander Mukhi Sharma hnen aṭangin lehkha an dawng a, India Senior Men's Basketball Team-a Mizo tlangval Lalrina Renthlei tel thu a ni. Mizoram Super League Season 4 MVP Lalrina hian July 5, 2018 aṭangin National Coaching Camp a zawm ang.

Tuikhuahtlang tlangval Lalrina hi Mizo basketball player zingah H. Laldinsanga hnua India team-a koh leh hmasa ber a ni a, Saron Veng tlangval Mapuia hi coaching staff-ah a tel thung. India hian 2019 FIBA Basketball World Cup qualifying-ah match hnih khelh hmabak an nei a, Syria (June 28) leh Jordan (July 1) te nen an inhmachhawn ang.

Mi bik Lalrina
Lalrina hian tun hmain snooker-ah India aiawhin vawi nga a feh chhuak a, junior level-ah vawi hnih leh senior level-ah vawi thum a ni a. Basketball team-a India ai a awh leh thei a nih chuan infiamna pahnihah ram aiawhin a fehchhuak thei dawn tihna a ni a, mi bik tan chauha tih theih a ni.

Zarkawt BCA player Lalrina hian 'talent' a nei ṭha a, infiamna hi a chemkalna ni bawk mah se hemi phena a thawhrimna hi en kan phal chi a ni lo. MSL3-a Mission Veng Vikings a champion pui hnuah Lalrina'n chona thar hmachhawnin Zarkawt BCA a zawm a, kum zawna club pahnih tana MSL champion hmasa ber a ni. Hetiang hlawhtlinna nei tur hian Lalrina'n personal trainer hial a la a, awmze neiin a hranpain training a nei a, court chhungah a hmuhnawm fal hle.

Lalrina chuan, "Infiamna chi hnih a India ram aiawh hi chu ka châk ber pakhat a ni a, tihlawhtlin ve theih a châkawm khawp mai," tiin Vanglaini a hrilh.

Hmabak a awm
Mizo basketball legend tiha sawi theih chu Mapuia a ni a, Khatla TBL coach leh player nilai hi kum 2005 khan India aiawhin a lo fehchhuak tawh. Saron Veng tlangval hian MSL hmasa pahnihah pawh Khatla TBL champion puiin a hmasa berah phei chuan MVP-a thlan a ni.

Mapuia chuan, "India team-a Mizo awm lohna hi a rei ta mah mah a, Lalrina hian a tihtawp a ṭul. Ani hian theihna a nei a, a tel phak ngei pawh ka beisei a, chumi tur chuan ka duhsak bawk," tiin Vanglaini a hrilh.

Lalrina hi final squad-ah a la awm lo a, training-naa a chet ṭhat dan a zirin final squad-ah a awm dawn chauh. Zarkawt BCA player Lalrina chuan, "India aiawh a khelh chu level sang ber ang kha a ni a, a ṭha ber zinga min ko ve chu a lawmawm khawp mai. Mahse final squad a la ni lo a, hmabak a la awm," tiin a sawi.

Engtin zel?
MBBA president Malsawmtluanga chuan "Lalrina Renthlei hetianga India Senior Men's Basketball Team tana koh a ni hi MBBA chuan kan lawmpui a, a tumruhna leh thawhrimnate Pathianin mal a sawm sak. Mizoram Basketball-in mel lung thar kan kai a, Zonet nena ṭangkawpin Mizoram Super League hlawhtling tak kan din hnuah Mizo ten basketball kan hlut thar leh a; club leh player-te inpekna zarah basketball chuan hma kan sawn zel a, BFI leh phai lama basketball hotuten Mizoram hmasawnna hi an ngaihven ve zel," tiin Mizoram chhunga basketball-a hmasawnna chuan rah ṭha a thlen thu a sawi.

MBBA hnathawh fakin Lalrina chuan, "A hmasa berah chuan Pathian vang a ni a, a dawtah chuan MBBA hruaitute hnathawh rah a ni a. Anni zarah phai lam nen kan inkungkaih a ṭha chho zel a, tun ṭumah pawh hian national level competition khel miah loin koh ka ni a. MSL inelnaa thuneihna chang pha an koh luh theih vang te a ni a, anmahni zar a ni," a ti.

Tun dinhmun a thlen theih chhan sawi zuiin Lalrina chuan, "Ka chhungte puihna vang liau liau a ni a, ka nupui hnen aṭangin thlawpna ka dawng ṭha bawk. Tunah hian naute kan nei zo deuh chiah a, kalsan a huphurhawm a. Amaherawhchu chona thar hmachhawn tur chuan kalsan chin kan neih erawh a ngai," tiin Vangalini a hrilh.

Kum 27 mi Lalrina Renthlei hian nikum April 7 khan khan Zorampari (Atei) nen an innei a, May 23 khan an pa pakhatna ni turin Lucas Lalpeka Renthlei an nei a ni.