Final lut tur hriat dawn

LBS Suzuki 21st Inter Branch YMA Volleyball Tournament chu zanin hian mipa semifinal khelh a ni dawn. R. Dengṭhuama Indoor Stadium-ah match hmasa zawk hi dar 8:00-ah khelh ṭan tur a ni dawn a, Aizawl khaw pawn team pahnih Thenzawl Vengthlang leh Zawlnuam Vengpui an inkhel ang.

Tualchhung volleyball a nun em emna hmun Thenzawl hian quarterfinal-ah champion lai Maubawk chu inkhel inhnehtawk takah 3-2 in an hneh a, an khingpui tur Zawlnuam hian NE Khawdungsei 3-1 in an hneh ve bawk. Final-ah Aizawl khaw pawn team pakhat chu an lut ngei dawn tihna a ni.

Semifinal hnuhnung zawkah Mizoram chhunga volleyball hmunpui tia sawi ngam pahnih Muanna Veng leh Hunthar Veng an inhmachhawn dawn. Veng pahnih hi Pro Volleyball team nei an ni a, Mizoram Volleyball Association hnuaia inelna lian berah pawh tawnhriat nei player an kawl nual avangin an inkhel a hmuhnawm ang.