World Cup khel tur Salah?

Egyptian Football Association chuan an thiampuipa Mohamed Salah chuan World Cup-ah a hmel a lan hman dawn niin an sawi.

Liverpool forward hi Champions League final-ah Real Madrid nen an inkhelh ṭumin a inhliam a, a hliam hi dar pelh a nih avangin World Cup khelh loh hlauhthawnawmah a awm hman.

Mahse, Egyptian FA thu chhuak thar ber hi rin tur a nih dawn chuan Salah hi World Cup-ah kan hmu dawn tihna a ni a, Egypt beiseina a sang leh sawt ang.

Spain-ah Salah
Salah hian Thawhlehni zan khan a dar hliam enkawl turin Spain a pan a, kum 25 mi forward hi Valencia airport-ah journalist pakhatin lo nang fuh mah se zawhna chhanna a pe duh lo.

Nilaini khan Salah hian an ram team doctor leh Egyptian FA president Hany Abu Rida a hmuh chhunzawm a, an pathuma an inhmuh zawha an thuchhuah thar ber chu Salah-a'n World Cup a khelh theih tur thu a ni.

Egyptian FA chuan, "Salah chu Abu Rida leh national team doctor te nen Spain-a an inhmu a, pathian khawngaihna zarah Football Association chuan Salah hliam hian kar thum aia rei a daih a ring lo a ni," tiin twitter-ah an ziak.

Kar thum chu
Sergio Ramos nen ball an inchuhna lama Salah inhliam ṭum kha May 26 zan a ni a, June 15-ah a hliam hian kar thum a tling chiah dawn tihna a ni. Egypt hi World Cup-ah hian Group A-ah Uruguay, Russia leh Saudi Arabia te nen an awmho.

Match hmasa ber hi June 15 tlai dar 5:30-ah Uruguay nen an khel dawn a, Egyptian FA thuchhuah aṭanga a lan danin Salah chu kar thum aia rei chawl dawn lo mah se Uruguay hmachhawn nghal tura beisei chi erawh a ni lo.

Pharaoh (Egypt sawina) hian June 19-ah Russia nen an match hnihna an khel ang a, beisei ang chuan match hnihna aṭang hian Salah a inlan hman dawn tihna a ni - Egypt tan last 16 lut turin an match hnuhnung pahnih hi a pawimawh lehzual ang.

Salah beiseina
AS Roma forward hlui hian a inhliam hnu lawkah khan World Cup khel tura dam hman ngei a tum thu a lo sawi tawh a, fan-te ṭawiawmna leh duhsakna chu a chakna hnar a nih thu a sawi.

Salah chuan, "Zan duhawm lo tak a ni a, mahse huaisen taka engkim hmachhawn ṭhin mi ka ni. Beiseina tlemte chauh awm mah se in hlimna thlen turin Russia-ah ka kal ngei ka beisei a, in mi ṭawiawmna leh hmangaihna chuan ka mamawh chakna min pe dawn a ni," a ti.

Champions League final zawhah khan Liverpool boss Jurgen Klopp chuan Salah hliam a serious thu sawi mah se tunah chuan Egyptian mipui atchilh rawn hian World Cup a khel ngei dawn niin a lang ta.

Salah vangin Egypt
Mohamed Salah-a'n tun season-ah Liverpool tan a professional career-a a hun duhawm ber a tawng a, inelna hrang hrangah match 52 khelin goal 44 a khung sak - tun dinhmunah kher chuan khawvel eng team-ah pawh khel phak tur a ni.

Hei vang tak hian a hliamin Egypt ram pumpui a nghawng hi a mak lo a, mipui ngaihven a ni hi a awm lo hran lo. World Cup qualifier-ah khan Egypt hian an match hnuhnung ber dawtah Congo an hmachhawn a, an chak chuan kum 28 hnuah World Cup an khel dawn.

Salah-a'n goal hmahruai a khung hnuah Congo-in sut leh mah se Salah vek hian injury time-ah penalty hmangin chakna goal a khung a, an ram team chu World Cup a hruai thleng.

Salah telna Egypt
Salah telna Liverpool an danglam ṭhin angin Salah telna Egypt hi team dang daih an ni ṭhin. PFA Player of the Year ni lai hian ram tan match 57 khelin goal 33 ngawt a khung tawh.

World Cup qualifier-ah ringawt pawh khan match rukah goal nga a khung sak a, team tana innghahna a nihzia hai tur a awm lo. Kar thum bak chawlh a mamawh dawn lo nia sawi a nih takah chuan Russia leh Saudi Arabia-in tun aṭangin Salah dan dan tur an ngaihtuah tel a ṭul ang.

Egypt hian zanin dar 12:45-ah Colombia chu World Cup inbuatsaih nan friendly match an khelhpui dawn a, June 6 zanah Belgium an hmachhawn leh bawk ang.