Derby boss thar Super Frankie

1st June, 2018

Frank Lampard chu season thar aṭang chuan Derby County manager a ni dawn a, Super Frankie tia amah ṭantuten duh taka an koh hi khelmuala a chungchuan angin pawn lamah 'Super' tih a phu dawn em tih chu kan hre thuai dawn.

Chelsea legend hian Championship club enkawl tur hian kum thum chhung atan contract a ziak a, Derby manager nih tuma dil mi 20 zingah club thuneitute mit a tlung ta ber a ni - kum thum chhunga Derby manager pasarihna tur a ni!

Lampard chuan, "Kalphung leh sulhnu ropui tak nei, Derby County te ang club enkawl hi ka chak em em ṭhin a, ka tan chuan tun hi hun duhawm a ni," a ti a, a phur hle.

Lampard a inringtawk
Player a nih laia England tana match 106 inlan thei Lampard chuan, "He club enkawl hna ka thawh dawn leh dawn loh chungchangah hun rei tak inngaihtuah nan ka hmang a, club chairman leh board member te nen pawh he club thiltum leh hmachhawpte kan sawiho a ni.

"Manager anga ka hna hmasa ber tur a ni dawn a, mahse coach ṭha ber ber te nena lo thawkho tawh ka nih avangin ka zam lo. Ka mimal theihna piah lamah min ṭawiawm tur team leh board thlengin ka thlir a, ka phur a ni.

"Hna awlsam tak a ni dawn lo tih chu ka hria a, mahse ka hmaaa chona inchhawp hi phur takin ka thlir lawk a ni," a ti a, Blues tana Lampard khelhpui ṭhin Chelsea youth team coach Jody Morris chuan Frankie hi a zawm ang.

Hei le legend
Premier League en ṭhin zingah Lampard ropuina inhrilh nawn a ngai lo. Chelsea tan match 648 a khelhah goal 211 a khung sak a, mimal chawimawina a dawn zawng zawng ziak dawn ila kan ziak seng lo ang.

Blues tan Premier League (3), FA Cup (4), League Cup (2), Champions League (1) leh Europa League (1) nomawi a chawi a, West Ham aṭanga career ṭantu hian Swansea City, Manchester City leh New York City tan a khel bawk.

Derby chairman Mel Morris chuan, "Frank-a'n a career-a a tawn tawh ang tawng thei hi player tlemte chauh an awm. Hnehna chan duh mi leh hruaitu ṭha tak a nih avangin kan coach nih duh langsar tak tak zingah ani hian kan mit a tlung ber a ni," tiin Lampard an lakluh chhan a sawi.